МЗШВ формира комисии за увид на штетите од невремето на 11 септември

Сподели со своите пријатели

Министерството за земјоделство, шумарство и водостопанство (МЗШВ) денеска формира комисии за увид на настанатите штети во регионите кои на 11 септември годинава беа зафатени од пороен дожд, електрични празнења, силен ветер и град. 

Согласно извештајот од УХМР и теренскиот увид од страна на подрачните единици при МЗШВ, утврдено е дека се причинети штети врз земјоделски култури во регионите на Демир Хисар, Ресен, Македонски брод, Тетово, Прилеп, Долнени, Кривогаштани, Велес, Свети Николе, Куманово, Кавадарци, Росоман, Кисела вода и Гази баба.

МЗШВ ги информира сите земјоделски стопанства од овие региони кои претрпеле штети, да поднесат барања до подрачните единици од 20 септември до 5 октомври 2017 година.

– Откако земјоделците ќе поднесат барања за претрпени штети до подрачните единици, комисиите на терен ќе извршат увид на настаната штета од временската непогода, информира Министерството.

Според првичните прелиминарни проценки, невремето има нанесено штети на околу 2.000 хектари земјоделски површини со овошни и лозови насади, градинарски и индустриски култури.

Проценката на штетите ќе се спроведува согласно Законот за земјоделство и рурален развој и Уредбата за начинот на утврдување на неповолен климатски настан, настаната штета, пресметување на загубата на приходот, пресметката на штетата, постапката за исплата на помошта. По завршувањето на увидот на лице место, комисиите ќе изготват записници за утврдената штета кои ќе бидат доставени до Секторот за анализа на земјоделска политика во МЗШВ, кои потоа ќе се достават до Бирото за судски вештачења. Бирото ќе изготви извештаи со проценка на настаната штета во денари, поединечно за секој барател. Добиените извештаи од Бирото за судски вештачења ќе бидат проследени за исплата до Агенцијата за финасиска подршка во земјоделството и руралниот развој, која за секој подносител на барање ќе изготви решение за исплата за настанатата штета или известување доколку не ги исполнува условите за обештетување.

Извор: МИА / фото: архива

Loading...