За 10 до 15% е зголемен бројот на интервенции од почетокот на летото во Службата за итна медицинска помош, информираат лекарите од оваа установа кои посочуваат дека најчесто помош бараат лицата со хронични заболувања.
Често се јавуваат пациенти кои имаат симптоми како зголемен крвен притисок, повраќање и гадење, изјави доктор Марјан Спирковски, раководител на службата за Итна помош од Куманово.
Лекарите ги советуваат хронично болните редовно да ја земаат пропишаната терапија, да не излегуваат на сонце во периодот од 10 до 17 часот, а доколку мора да излезат, да носат лесна и светла облека и да внесуваат доволно течности.
Според лекарите, во овој период од годината често се јавуваат и пациенти кои бараат помош за стомачни заболувања.
Најчесто станува збор за деца, но заболуваат и повозрасни лица. Симптомите се дијареа, општа малаксаност, гадење, повраќање, вртоглавица и главоболки – вели доктор Спирковски.
Како превентивни мерки лекарите ги посочуваат темелното миење на овошјето и зеленчукот и правилното чување на храната. На граѓаните кои патуваат на одмор им се препорачува да носат вода и храна која не е лесно расиплива и за време на патувањето да избегнуваат брза храна.