Русија ја обвини Украина дека во средата соборила руски воен транспортен авион над пограничниот регион Белгород, при што загинал екипажот и 65 заробени Украинци.
Украинскиот претседател Володимир Зеленски тогаш повика да се отвори меѓународна истрага.
„Очигледно е дека Русите си играат со животите на заробените Украинци, со чувствата на нивните најблиски и со емоциите на нашето општество“, рече тој, но не потврди дека затворениците биле во авионот.
„Мораме јасно и колку што е можно да ги утврдиме сите факти, имајќи предвид дека авионот е соборен на руска територија, што е надвор од наша контрола“, рече Зеленски.
Во четврток во 17 часот на барање на Москва ќе се одржи итен состанок на Советот за безбедност, соопшти во средата Претседателството на Советот.
Украинската Воена разузнавачка служба (ГУР) потврди дека нема „сигурни информации“ за патниците на соборениот Ил-76, истовремено потврдувајќи дека размената на затвореници била „планирана“, но на крајот не била одобрена.
Претходно руското Министерство за одбрана ја осуди Украина за „соборувањето“ на руски воен авион во кој се превезуваа „украински војници за размена“.
Според Москва, украинската армија „знаела“ дека Русите ќе ги превезат затворениците во Белгород, а потоа до местото на средба на границата.
Украинските разузнавачи, напротив, уверуваа дека Киев „не бил информиран“ за потребата да се обезбеди воздушен простор во таа област.
Украина не го знаела „бројот на возилата, рутата и начинот на транспортирање на затворениците“, велат од службата, обвинувајќи ја Москва дека намерно „ги доведува во опасност“ во овој случај.
Руската војска тврди дека украинските сили истрелале „два проектили“ од „противвоздушен одбранбен систем“ за да соборат воен транспортен авион „Ил-76“, а потоа „би можеле да ја обвинат Русија“.
Авионот се урнал во близина на руското село Јаблоново, на 45 километри од границата со Украина.
Според Москва, „65 заробени Украинци кои биле во авионот, како и екипаж од шест лица и тројца руски војници загинале“, додаваат од руската армија.
Во соопштението, украинската војска вети, без директно да го спомене, дека ќе продолжи да „уништува транспортни авиони и да го контролира воздушниот простор (…) вклучувајќи ја и областа Белгород-Харков“.
Белгородската област редовно е мета на украински ракетни и беспилотни летала поради близината на границата и како одговор на постојаното руско бомбардирање на Украина.
Претходно портпаролот на Кремљ Дмитриј Песков вети дека ќе се „разјаснат“ околностите за падот, а претседателот на Думата, Вјачеслав Володин увери дека за соборување на авионот биле употребени „американски и германски ракети“.
Според Киев, повеќе од 8.000 Украинци, вклучително и повеќе од 1.600 цивили, се во руско заробеништво.
Во јули 2022 година, Русите и Украинците веќе се обвинуваа меѓусебно за смртоносниот бомбашки напад на затвор во кој се држат Украинци во Оленивка, село во источна Украина окупирана од Русија.
Сите информации поврзани со најновите случувања со војната во Украина можете да ги прочитате ТУКА.