Американецот (35) Шелдон Томас, кој помина речиси 19 години во затвор за убиство, откако детективите навеле сведок да идентификува погрешна личност, беше ослободен во петокот, јавува Си-Ен-Ен.
На Томас, кој беше осуден за убиство на 14-годишно момче на Бадник 2004 година во Њујорк, пресудата му беше поништена и обвиненијата беа отфрлени во четвртокот, неколку години откако очевидец го идентификуваше од погрешна фотографија, рече окружниот обвинител во Бруклин, Ерик Гонзалес.
Томас имал само 17 години кога бил уапсен и обвинет за убиство, покажуваат судските записи.
Неговото ослободување уследи по опсежна истрага од страна на Одделението за поништување пресуди на окружниот обвинител во Бруклин.
Гонзалес рече дека случајот против Томас бил „компромитиран од самиот почеток со сериозни грешки и недостаток на веројатна причина за апсење на Томас.“
Понатаму му биле ускратени правата на соодветен процес кога обвинителството продолжило и откако била откриена погрешната идентификација, со што неговата осуда „суштински неправедна“.
Томас беше еден од тројцата наводни членови на банда обвинети за убиство на тинејџерот Андерсон Бурси и повредување на уште едно лице.
За време на предистражното рочиште во 2006 година, инспекторот кој работеше на случајот, под вкрстено испрашување призна дека користел фотографија од погрешниот Шелдон Томас и извршил лажно сведочење, рече Гонзалес.
Друг детектив рече дека Томас им рекол дека не е човекот на фотографијата, според канцеларијата на државниот обвинител.
Во тоа време, судијата рече дека сѐ уште постои веројатна причина поради анонимни совети, додавајќи дека фотографијата личи на Томас, иако се работи за друга личност.
Од 2014 година, работата на Одделението резултираше со укинување на 34 пресуди. Во моментов има 50 отворени истраги, според портпаролот на обвинителството
– Мора да се стремиме да обезбедиме правичност и интегритет во секој случај и да имаме храброст да ги исправиме грешките од минатото – рече Гонзалес.