Украинскиот претседател Володимир Зеленски потпиша закон со кој се намалува старосната граница за воена мобилизација за две години – од 27 на 25 години.
За време на повеќе од две години војна, Киев се соочува со големи загуби на бојното поле.
Властите во Киев се обидуваат да ги пополнат воените редови, откако бројот на доброволци опадна.
Зеленски во декември рече дека се потребни уште 500.000 војници.
При подготовката на нацрт-законот, Министерството за одбрана на Украина го оправда намалувањето на старосната граница за воен рок со потребата да се пополнат резервите.
Пред оваа промена на законот, мобилизацијата важеше за Украинците на возраст од 27 до 60 години, дури и ако тие немаа искуство во воена служба.
Иако законот беше изгласан од пратениците во мај 2023 година, тој не стапи на сила бидејќи Зеленски не го потпиша.
Не е јасно што го натера претседателот да го потпише законот сега, но тој претходно предупреди на плановите на Русија да започне офанзива на пролет или лето.
Потпишувањето на законот може да значи дека Киев има намера да изгради силни одбранбени утврдувања како подготовка за руска офанзива.
Украинските власти се надеваа и ветија дека ќе ги вратат деловите од територијата освоена од Русија, како и дека ќе ги прекинат руските линии за снабдување со Крим, полуостров што Русија го анектираше во 2014 година.
Сепак, руските сили ја прекинаа контраофанзивата на Киев минатата година и сега се стравува од руска офанзива која може да биде одлучувачка.
Украинските политички и воени власти со месеци укажуваат дека им недостига западно оружје и дека нема да можат да се одбранат без современи системи за противвоздушна одбрана.
Украина во голема мера се потпира на западната воена помош, особено на ракетите со долг дострел и системите за противвоздушна одбрана, но дополнителни милијарди долари и евра се блокирани во американскиот Конгрес и во Европската унија поради политички несогласувања.
Рускиот претседател Владимир Путин изјави дека повеќе од 600.000 негови војници се борат во Украина, но не откри колкумина ги загубиле животите таму.
Од почетокот на војната, Киев и Москва само во неколку наврати зборуваа за сопствените загуби.
Во извештајот на американското разузнавање објавен во декември се проценува дека 315.000 руски војници биле убиени или ранети од почетокот на војната, што според нив било речиси 90 отсто од рускиот воен персонал на почетокот на инвазијата.
Зеленски во февруари рече дека 31.000 украински војници биле убиени од почетокот на војната, но американските власти соопштија дека бројот на загинати украински војници е најмалку 70.000 и 120.000 ранети.
Сите информации поврзани со најновите случувања со војната во Украина можете да ги прочитате ТУКА.