Три лица осомничени за хеликоптерската несреќа кај Струмица

Сподели со своите пријатели

Основното јавно обвинителство – Струмица издаде наредба за спроведување истражна постапка против три лица осомничени за хеликоптерската несреќа во која на 10 јули 2014 година загинаа четворица пилоти на Министерството за внатрешни работи.

Прибраните докази и извршени анализи до моментов укажуваат на сомнение дека лицата извршиле кривично дело – тешки дела против општа безбедност.

Надлежниот јавен обвинител и во текот на истрагата ќе продолжи да прибира податоци и докази, како и да сослушува сведоци кои ќе помогнат за целосно расветлување на случајот. Ќе бидат сослушани и осомничените лица – соопшти Обвинителството, а пренесуваат националните медиуми.

Во хеликоптерската несреќа загинаат четворица најискусни пилоти на македонската полиција, Марјан Трајковиќ од Куманово, Тоде Орешков од Кавадарци, Иљо Лопатички од Битола и Драги Мицев од Струмица – началник на воздухопловните сили на МВР.

Како што вчера објави „Макфакс“, во центарот на истражната постапка е неосветлениот антенски столб на Македонската радиодифузија. Но, со истрагата е опфатена и опремата за ноќно летање. Како што дознавме, обвинителството се обратило од израелската фирма „Елбит“ од која е набавена опремата за ноќно летање, од којашто е побаран одговор дали визирите за ноќно летање смееле да се користат во населено место и во услови во какви што бил изведуван последниот ноќен лет на рутата од Скопје преку Велес, Неготино, Валандово, Струмица, Берово, Делчево и назад.