Американскиот претседател Доналд Трамп привремено ја суспендираше американската операција за придружба на комерцијални бродови низ Ормутскиот теснец, наведувајќи дека одлуката е донесена поради напредокот во преговорите со Иран и на барање на Пакистан и другите земји кои учествуваат во медијацијата.
Трамп изјави дека операцијата „Проект Слобода“, започната на почетокот на неделата за обезбедување премин низ еден од најважните нафтени коридори во светот, е ставена на кратка пауза поради, како што рече, „значаен напредок“ во преговорите, објави CBS.
„Врз основа на барањата на Пакистан и другите земји, огромниот воен успех што го имавме за време на кампањата против Иран и фактот дека е постигнат голем напредок кон целосен и конечен договор со претставниците на Иран, меѓусебно се согласивме дека, додека блокадата останува на сила, „Проектот Слобода“ (движењето на бродови низ Ормутскиот теснец) ќе биде паузиран за кратко време за да се види дали Договорот може да се финализира и потпише“, напиша Трамп на мрежата Truth Social, пренесува Танјуг.
Одлуката е донесена и на барање на Пакистан
Тој додаде дека одлуката е донесена на барање на Пакистан, кој учествува во посредништвото меѓу двете страни, додека американската блокада на иранските пристаништа останува на сила.
За време на операцијата, американската војска веќе им помогна на некои бродови да поминат низ теснецот и отстрани дел од морските мини, додека десетици други бродови беа контактирани за безбедно поминување.
Исто така, имаше повеќе инциденти на море – американските разорувачи беа нападнати од ракети, беспилотни летала и моторни чамци, но немаше удари, според официјални лица.
Командантот на Централната команда на САД, адмирал Бред Купер, рече дека американските сили одговориле со уништување на неколку ирански бродови, што Техеран го негираше.
Пријавени се и напади врз комерцијални бродови на други земји во регионот, вклучувајќи инциденти пријавени од Обединетите Арапски Емирати.
Иранскиот министер за надворешни работи, Абас Аракчи, предупреди дека американската операција може да ги загрози преговорите, велејќи дека „нема воено решение за политичката криза“.