Во текот на изминатите неколку години, ТикТок стана една од најпопуларните социјални мрежи со повеќе од милијарда корисници, особено популарен кај помладите корисници. Благодарение на големиот број корисници, но и на зголеменото време што го поминуваат на таа мрежа, аналитичарите очекуваат ByteDance да ги зголеми тројно приходите од рекламирање на дури 11 милијарди долари оваа година. За споредба, тоа е повеќе од приходите од реклами на Твитер и Снапчет заедно.
Со цел да привлече уште повеќе корисници, односно да го зголеми времето што постоечките корисници го поминуваат во рамките на апликацијата, ТикТок планира да ја прошири својата понуда со – видео игри. Првите тестови на новата опција започнаа во Виетнам, каде некои корисници сега можат да играат видео игри во рамките на апликацијата. Според извори запознаени со состојбите во компанијата, ова е само почеток на тестирање на видео игрите и ByteDance има намера да ги претстави игрите на други пазари во јужноазиските земји, а можеби и пошироко.
Компанијата одби да го коментира почетокот на тестирањето игри во апликацијата, но портпаролот на ТикТок изјави за Ројтерс дека тие секогаш бараат начини да ја подобрат својата платформа и редовно тестираат нови опции и интеграции кои носат вредност на заедницата.
Првичниот план беше да се овозможи играње мини игри на ТикТок, односно поедноставни игри со кратко времетраење, но амбициите на ByteDance се многу поголеми. Ројтерс потсетува дека и Фејсбук во 2016 година лансираше Инстант игри на својата платформа, а минатата година Нетфликс лансираше видео игри во рамките на својата апликација.
Некои игри во рамките на ТикТок се веќе достапни на одредени пазари, а во иднина можеме да очекуваме првенствено игри од ByteDance, кое го презеде гејмерското студио Moonton Technology минатата година и исто така става зголемен акцент на пазарот на видео игри. Рекламите треба да се прикажуваат во рамките на игрите, а заработката ќе биде споделена помеѓу ТикТок и развивачот.