Шпанската влада свика втор итен состанок на експерти за семејно насилство за помалку од еден месец, по убиствата на шест жени и една млада девојка од почетокот на јануари.
Владата во Мадрид во овој поглед ја разгледува идејата да ги информира злоупотребените жени за тоа дали нивните партнери се осудени за насилни злосторства, објави Гардијан.
Шпанскиот кризен штаб за решавање на проблемите поврзани со насилството последен пат се состана по убиствата на 11 жени во декември минатата година.
Се потсетува дека 45-годишна жена и нејзината осумгодишна ќерка беа убиени во северозападната шпанска провинција Ваљадолид, пет дена откако 38-годишна жена беше убиена во напад во каталонската провинција Леида. .
Неодамнешниот бран на убиства го доведе бројот на жени убиени од нивните партнери на 1.188 од 2003 година, кога владата почна да бележи такви убиства.
Во истиот период, 49 деца биле убиени во напади како резултат на семејно насилство, а само во 2022 година 49 жени биле убиени од сегашни или поранешни партнери, додека 43 жени биле убиени во 2021 година.
„Досега во јануари шест жени и едно осумгодишно девојче се убиени од сексистичко насилство“, напиша вчера шпанската министерка за еднаквост, Ирене Монтеро.
„Министерството свикува состанок на кризниот комитет во петок за детално да го анализира секој случај и да открие што тргнало наопаку, што би ја подобрило координацијата за да се осигура дека секогаш ќе стигнеме таму каде што треба да бидеме на време“, рече Монтеро.
Соочена со нагло зголемување на ваквите убиства, шпанската влада предводена од социјалистите ги проучува предлозите што ќе им овозможат на властите да ги информираат жените кои се жртви на семејно насилство за претходните пресуди на нивните партнери.
Сепак, шпанскиот јавен обвинител за насилство врз жените истакна дека таквите предупредувања не можат да се издаваат „автоматски или на општ начин“, додавајќи дека треба да се земат предвид специфичните околности на секој случај.
Минатиот месец, владата ги повика судовите и обвинителите да ја засилат употребата на електронски нараквици за да ги заштитат жените чии поранешни партнери имале наредби за ограничување.
„Сметаме дека е важно да се промовира употребата на електронски уреди, како што се нараквици кои ги предупредуваат жените за присуството на агресори“, рече министерката за правда Пилар Лоп на крајот на декември.
Таа додаде дека од 2009 година, кога биле претставени овие нараквици, ниту една жена што ги носела не е убиена.
Сепак, опозициските партии ја обвинија владата дека не ги заштитила жените со воведување на контроверзен закон со кој им се дозволува на некои осудени сексуални престапници да им бидат намалени казните по жалба.