Руската платеничка група Вагнер престана да регрутира затвореници за да се борат во Украина, изјави во четвртокот основачот на Вагнер, Евгениј Пригожин.
„Регрутирањето затвореници од страна на приватната воена компанија „Вагнер“ целосно е запрено“, рече Пригожин како одговор на барањето на руските медиуми за коментар објавено на социјалните мрежи.
„Ние ги исполнуваме сите наши обврски кон оние кои сега работат за нас“, рече тој.
Вагнер почна да регрутира затвореници во рускиот казнен систем во летото 2022 година, а Пригожин, претприемач во ресторани кој одлежа девет години затвор за време на Советскиот Сојуз, им понуди на осудените помилување доколку преживеат шест месеци во Украина.
Вагнер не даде информации за тоа колку осуденици се приклучиле на неговите редови, но официјалните руски податоци објавени во ноември покажаа дека популацијата на затворите во земјата паднала за повеќе од 20.000 меѓу август и ноември, што е најголем пад во повеќе од една деценија.
Во декември, Ројтерс објави дека американската разузнавачка заедница верува дека Вагнер има 40.000 затвореници борци распоредени во Украина, огромно мнозинство од персоналот на групата во земјата.
Групата Вагнер играше сè позначајна улога во руската војна во Украина во последниве месеци, при што платеничките сили го водеа повеќемесечниот напад врз градот Бахмут во регионот на Доњецк.
Сите информации поврзани со најновите случувања со војната во Украина можете да ги прочитате ТУКА.