По серијата откажувања поради здравствени проблеми, кралицата Елизабета Втора ја очекуваат во вторник на нејзиното прво големо јавно излегување по неколку месеци, на религиозна церемонија во чест на нејзиниот покоен сопруг принцот Филип.
Кралицата, која во април ќе го прослави својот 96-ти роденден, е на програмата на церемонијата што ја најави Бакингемската палата, која ќе започне попладне, за принцот кој 73 години и беше сопруг и „карпа“.
Во средината на март, Елизабета го откажа своето учество во последен момент на верска служба како дел од Годишниот ден на Комонвелтот, иако беше на програмата. Таа на крајот беше претставена од принцот Чарлс.
Иако Елизабета продолжува со некои јавни обврски, таа значително го намали распоредот откако беше хоспитализирана на преглед во октомври.
Од почетокот на пандемијата, таа се повлече во замокот Виндзор, четириесетина километри од Лондон.
Кралицата неодамна призна дека има проблеми со одењето и дека се потпира на бастун.
Според медиумите, таа приватно користи инвалидска количка, а во градината Виндзор кола за голф.
Кралицата имаше ковид-19 во февруари, но со поблаги симптоми.
Принцот Филип почина во април минатата година, непосредно пред да наполни 100 години.
Бидејќи почина во време кога во Британија, како и насекаде во светот, беа воведени строги мерки поради коронавирусот, погребот беше извршен во тесен круг.
И покрај тоа што кралското семејство беше погодено од неколку скандали, Елизабета и понатаму е многу популарна во Британија.
Во јуни е закажана четиридневна церемонија за да го прослави нејзиниот 70-ти роденден на тронот.