Соединетите Американски Држави во среда блокираа нацрт-резолуција на Советот за безбедност на ОН, која повикува на итно, безусловно и трајно прекинување на огнот во Газа меѓу Израел и палестинската милитантна група Хамас, и за непречено дистрибуирање на хуманитарна помош низ целата енклава.
„Ставот на Соединетите Американски Држави е јасен, не можеме да поддржиме никакви мерки освен ако тие не го осудат Хамас и не го повикаат да се разоружа и да ја напушти Газа“, изјави вршителката на должноста амбасадор на САД во ОН Дороти Шеа пред гласањето.
„Оваа резолуција би го охрабрила Хамас и би ги поткопала дипломатските напори за постигнување прекин на огнот што би ја почитувал фактичката состојба на теренот“, рече таа за документот предложен од 10 од вкупно 15-те членки на Советот за безбедност.
Другите 14 земји гласаа за прифаќање на нацрт-резолуцијата, но како една од петте постојани членки на Советот, САД имаат право на вето.
Израел ги отфрли барањата за безусловно и трајно прекин на огнот, велејќи дека Хамас не може да остане во Газа.
По завршувањето на двомесечното прекин на огнот во март оваа година, тој повторно започна воена офанзива во палестинската енкава, барајќи ослободување на заложниците што ги држи Хамас.
Пред гласањето во Советот за безбедност, првиот човек на ОН за хуманитарна помош, Том Флечер, повторно апелираше на хуманитарните организации да им се дозволи да дистрибуираат пакети до жителите на Газа, истакнувајќи дека имаат план, залихи и искуство во слични ситуации.
„Отстранете ги ограничувањата за тоа каква и колку помош можеме да донесеме.“ „Осигурајте се дека нашите конвои нема да бидат блокирани од доцнења и одбивања“, изјави Флечер.
ОН долго време го обвинува Израел за попречување на испораката и дистрибуцијата на хуманитарна помош во воената зона.
Од друга страна, Израел возвраќа дека Хамас краде пакети со хуманитарна помош, што го негира.