Администрацијата на Бајден објави дека почнала да споделува докази со Меѓународниот кривичен суд (МКС) во Хаг за воените злосторства извршени во Украина.
Соопштението стави крај на повеќемесечниот спор во администрацијата за ова прашање, во кој Советот за национална безбедност (НСЦ) и Стејт департментот ја поддржаа соработката со МКС, а Пентагон се спротивстави, велејќи дека тоа ќе имплицира поддршка за меѓународен суд кој би можел еден ден побара кривично гонење на американски војници.
Тивката одлука да се започне споделување информации за руските воени злосторства со обвинителот на МКС, Карим Кан, сугерира дека, по околу четири месеци одложување, Џо Бајден зазеде конечен став, заклучува Гардијан.
„Можам да потврдам дека САД ќе споделат докази со МКС“, изјави американски претставник за Гардијан.
„Претседателот беше јасен од почетокот на рускиот напад врз Украина: мора да има одговорност за сторителите и олеснувачите на воените злосторства и злосторствата во Украина“, рече портпаролот на НСЦ.
„Ние поддржуваме голем број меѓународни истраги за да се идентификуваат и изведат пред лицето на правдата одговорните, вклучително и преку Канцеларијата на јавниот обвинител на Украина, Заедничкиот истражен тим преку Европравда, Мисијата на Обединетите нации за набљудување на човековите права, експертските мисии формирани во рамките на на „Московскиот механизам“ на ОБСЕ, меѓу другото и на Меѓународниот кривичен суд“, рече тој и додаде:
„Конкретно за МКС, нема да разговараме за специфичности и каква било соработка, што е во согласност со судската практика да се третираат барањата за соработка на доверлив начин.
Според Њујорк Тајмс, кој прв ја објави одлуката, администрацијата почнала да ги информира членовите на Конгресот за новата политика во вторникот.
Сите информации поврзани со најновите случувања со војната во Украина можете да ги прочитате ТУКА.