Многу мажи кои ја напуштија Русија во страв дека ќе бидат мобилизирани и испратени на фронтот во Украина, се враќаат дома откако рускиот претседател Владимир Путин објави крај на хаотичната мобилизација во земјата.
По брзањето да ја напуштат земјата, што исто така беше поттикнато од гласините за затворање на границите, многумина се соочија со суровата реалност на обидот да врзат крај со крај во непознат град.
700.000 мажи ја напуштиле земјата за две недели
„Јас и брат ми се обидовме да најдеме работа во Казахстан – барем фиктивна за да добиеме дозвола за престој – но ништо не беше изводливо“, рече Павел (21) од Москва, кој се врати во Русија по три недели во Казахстан.
„Побегнав поради општа паника. Патувањето нѐ чинеше околу 1.650 долари“, изјави тој за „Москва тајмс“.
Русија почна да регрутира свои граѓани на крајот на септември, што доведе до вистински егзодус од земјата.
Летовите беа распродадени, имаше гужви на границите… Оние кои беа доволно стари за да бидат регрутирани се обидоа што поскоро да ја напуштат државата.
Официјални лица на Кремљ процениле дека 700.000 мажи ја напуштиле земјата за помалку од две недели.
Сега, сепак, некои се враќаат дома. Враќањето дојде откако официјалните лица ветија дека никој повеќе нема да биде регрутиран.
Путин во понеделникот им рече на новинарите дека „мобилизацијата е завршена“, а министерот за одбрана Сергеј Шојгу минатата недела рече дека целта на Путин да повика 300.000 резервисти е исполнета.
Семјон, столар од Москва, кој одби да го каже своето презиме, рече дека одлучил да се врати дома од Ерменија бидејќи градоначалникот на Москва Сергеј Собјанин најавил крај на мобилизацијата во руската престолнина.
„Полицијата престана да апси мажи на улиците и во метро-станиците“, рече Семјон, кој ги остави сопругата и двете ќерки во Москва.
Сепак, многумина остануваат претпазливи, стравувајќи дека може да се активира втор бран на мобилизација доколку Русија продолжи да трпи големи загуби во Украина.
„Сè уште мислам дека е глупава одлука да се вратам, но тешко е да се одолее на емоциите“, рече Павел.
Братот на Павел, кој одби да го каже своето име, сè уште е во Казахстан, но за The Moscow Times изјави дека има намера наскоро да отпатува во Русија.
„Тие стаорци не се добредојдени“
Оние кои се враќаат се соочуваат не само со можноста да завршат во затвор доколку властите проценат дека ја избегнале воената обврска, туку и со општата стигма поттикната од официјалната реторика.
Влијателниот руски пратеник Андреј Климов минатиот месец рече дека оние кои избегнале мобилизација со напуштање на земјата треба да бидат етикетирани како странски агенти.
Претседателката на Советот на Руската Федерација, Валентина Матвиенко, таквите Руси ги нарече „стаорци“ и рече дека повеќе не се добредојдени во земјата.
Властите во Русија би можеле да ја обноват мобилизацијата оваа зима, објави веб-страницата Медуза минатиот месец, цитирајќи неименувани претставници на Кремљ.
Бизнисмен од Санкт Петербург кој моментално живее во Ерменија вели дека се уште не планира да се врати во Русија.
Столарот Семојен, кој неодамна се врати во Москва, рече дека ако Кремљ повторно започне со регрутирање, тој повторно ќе ја напушти земјата.
„Ако повторно има мобилизација, тогаш повторно ќе си заминам. Но, овој пат со семејството“, рече тој.
„Требаше да ги видите кутрите души“
Враќањето на Русите дома додека мобилизацијата стивнува не е изненадување за Ника Карчевска (24), која се пресели во Грузија по почетокот на војната во Украина.
Таа доброволно се пријави да им помогне на оние кои избегаа од земјата на крајот на септември.
„Имаше и такви кои заминаа со не повеќе од 165 долари. Требаше да ги видите кутрите души. Немаа ни работни места што можеа да ги работат онлајн. Не знам на што се надеваа“, изјави таа за The Moscow Times.
„Многу од оние на кои им помогнав веќе се вратија дома. „Мислам дека половина од бегалците се вратија во Русија“, рече таа.
Сите информации поврзани со најновите случувања со војната во Украина можете да ги прочитате ТУКА.