Русија изврши серија ноќни напади со дронови и ракети врз цели ширум Украина, а целта беше јужното пристаниште Одеса втора ноќ по ред, соопштија денеска украинските власти.
„Тешка ноќ на воздушни напади за цела Украина“, рече Серхи Попко, шеф на воената администрација во Киев, преку Telegram.
Тој рече дека нападите на Одеса овојпат биле особено силни.
Регионалниот гувернер на Одеса Олех Кипер изјави дека деталите за штетите и можните жртви по „силниот“ руски напад во регионот ќе бидат објавени подоцна.
– Русија го гаѓаше Киев со беспилотни летала Шахед од иранско производство, но „неуспешно“, рече Попко.
Украинската противвоздушна одбрана ги пресретна сите дронови насочени кон главниот град, а прелиминарната истрага покажа дека нема жртви.
Во украинската област Житомир, руските напади со беспилотни летала оштетиле инфраструктура и приватни домови, изјави регионалниот гувернер Виталиј Бунечко. Нема информации за жртви.
Официјални лица во украинските региони Полтава и Кировохрад, исто така, пријавија напади.
Украинските воздухопловни сили објавија дека војската пресретнала 13 од 16 крстосувачки ракети Калибр, 23 од 32 истрелани беспилотни летала Шахед и една ракета КХ-59.
Според извештајот, Русија истрелала и осум крстосувачки ракети KH-22 и шест ракети со висока прецизност Оникс. Ракетите Оникс се насочени кон инфраструктурата во областа Одеса.
Во исто време, пожар во воен објект на Крим, кој беше припоен од Русија, предизвика затворање на важен излез и евакуација на цивили од четири села, изјави Сергеј Аксионов, гувернер на таа област назначен од Русија.
Последните напади ширум Украина се случија еден ден откако Москва го изврши она што руското Министерство за одбрана го опиша како одмазднички напад врз украинските воени објекти во близина на Одеса и крајбрежниот град Миколаев, користејќи прецизно оружје испукано од морето.
Русија ја обвинува Украина за нападот на 17 јули на мостот Керч што ја поврзува Русија со Крим, клучна рута за снабдување на војската и цивилите.
Сите информации поврзани со најновите случувања со војната во Украина можете да ги прочитате ТУКА.