Сè поголем е расколот меѓу украинските и западните разузнавачки служби, пишува лондонски Тајмс, наведувајќи дека намерата на шпионите во Киев да ја пренесат војната во Русија со ликвидација на политички цели може да биде од корист за Москва.
Британскиот историчар Марк Галеоти, експерт за модерна Русија, вели дека украинските и западните разузнавачки служби, пред се оние од САД и Велика Британија, тесно соработуваат од 2014 година, кога Русија го анектираше полуостровот Крим.
Без транспарентност
Галеоти ги припиша тензиите на резервираност „во врска со украинската стратегија да ја однесе војната во Русија со бомбардирање и убивање не само воени, туку и политички цели“.
– Западот е особено загрижен што, спротивно на украинското верување дека овие удари ќе ја поткопаат поддршката на рускиот народ за воената кампања против Киев, тие би можеле да имаат спротивен ефект и да го подигнат моралот и поддршката за специјалната воена операција, како тие ја нарекуваат инвазијата на Украина во Русија.
Галеоти наведува и дека, и покрај силната соработка меѓу разузнавачките служби, Киев всушност никогаш не бил целосно транспарентен со своите сојузници и се свртел кон некои од нивните предупредувања.
– Западните земји кои ги убиваат своите непријатели од беспилотни летала во својот дел од светот, не треба да се жалат на нашите методи – изјави неименуван украински разузнавач.
Галеоти, исто така, укажа на длабоко вкоренетиот страв на Киев дека Западот ќе се „умори од Украина“, што ќе ја поткопа финансиската и воената поддршка на долг рок.
– Иако Украина нема да сака да преземе акција што дополнително може да го вовлече Западот во војна против Русија, можеби Киев повеќе нема да се обидува да ги спречи таквите акции – изјави Галеоти.
Помош од ЦИА
Од почетокот на конфликтот на 24 февруари минатата година, властите во Киев ги обвинуваат украинските разузнавачки служби дека режираат убиства на јавни личности во Русија.
Минатата година, руската Федерална служба за безбедност (ФСБ) ја обвини украинската СБУ дека стои зад убиството на Дарија Дугина, ќерката на политичкиот коментатор Александар Дугин, со поставување бомба под нејзиниот џип.
Во Москва тврдат и дека Киев стои зад убиството на Максим Фомин, воен блогер кој бил познат под псевдонимот Владлен Татарски, во кафуле во Санкт Петербург.
Во јули оваа година, ФСБ соопшти дека спречила заговор за атентат врз Маргарита Симонјан, главниот уредник на порталот Раша Тудеј и познатата новинарка Ксенија Сопчак.
„Вашингтон пост“ минатиот месец објави дека американската ЦИА потрошила десетици милиони долари за опремување на украинските разузнавачки служби со опрема за надзор и помош за изградба на голем објект.
Зеленски може да биде соборен од власт?
Олег Соскин, поранешен советник на двајца поранешни претседатели на Украина, предупреди дека мировните преговори меѓу Москва и Киев би можеле да станат доминантен наратив на Запад, а сегашниот шеф на државата Володимир Зеленски може да биде сменет ако продолжи да ја отфрла можноста за преговори.
– Зеленски, кој инсистира дека победата може да се постигне само на бојното поле, едноставно не може да влезе во преговори со Москва. Затоа, во Русија и во некои западни земји можеби мислат дека е време да им треба некој друг кој ќе се договори барем за привремено примирје во име на Киев. За да се случи тоа, Зеленски мора да биде неутрализиран – рече Соскин, кој ги советуваше украинските претседатели Леонид Кравчук и Леонид Кучма.
Сите информации поврзани со најновите случувања со војната во Украина можете да ги прочитате ТУКА.