Деновиве, Европа се соочува со екстремен топлотен бран кој го загрозува здравјето на милиони луѓе, а експертите предупредуваат дека илјадници дополнителни смртни случаи би можеле да бидат регистрирани за само неколку дена.
Температурите во некои региони надминуваат 40 степени, а нов јунски рекорд од 46°C е регистриран во шпанскиот регион Уелва.
Освен Шпанија, Италија, Грција, Португалија, Хрватска, Словенија и Западен Балкан доживуваат слично сценарио, каде што топлината предизвикува пожари, приеми во болница и цивилни жртви.
Националната метеоролошка служба издава црвени предупредувања, додека болниците се во состојба на готовност.
Во Шпанија, два од три града се под здравствено предупредување, а во дури 804 случаи се издадени предупредувања за највисоко ниво на подготвеност, според националната агенција Аемет.
Светската здравствена организација (СЗО) ги повика европските земји да реагираат брзо и решително, нагласувајќи дека ваквите топлотни бранови станаа предвидливи – но и спречливи.
„Веќе не е прашање дали ќе имаме топлотен бран, туку колку од нив ќе доживееме оваа година и колку долго ќе траат“, предупреди Марисол Иглесијас Гонзалез, експерт на СЗО за климатски промени и здравје.
Пјер Масло, статистичар на Лондонската школа за хигиена и тропска медицина, предвидува дека повеќе од 4.500 дополнителни смртни случаи би можеле да бидат регистрирани помеѓу 30 јуни и 3 јули.
Најранливите земји, според неговата анализа, се Италија, Хрватска, Словенија и Луксембург.
– Најлошите денови се очекуваат во вторник и среда, додаде Масло за ПОЛИТИКО.
Според голема студија објавена во јануари, во која коавтор е Масло, топлината веќе одзема повеќе од 175.000 животи годишно низ целиот европски регион на СЗО – од Исланд до Русија.
Се предупредува дека бројот на смртни случаи брзо ќе се зголеми ако итно не се спроведат сериозни климатски адаптации и мерки за заштита на ранливите групи.
СЗО повторува дека климатските промени, поттикнати од согорувањето на фосилни горива, се причина за сè почестите и интензивни топлотни бранови кои сериозно го загрозуваат здравјето на граѓаните.
Топлинските бранови ќе станат подолги, посилни и поразорни доколку не се преземат системски мерки на глобално ниво, вели организацијата.
Лекарите советуваат дека треба да се избегнува излегување во најжешкиот дел од денот (од 11 до 17 часот), да се пијат доволно течности, да се разладуваат просториите, редовно да се следат предупредувањата на локалните служби, да се грижи за постарите лица и хронично болните лица.