Денеска, Палестинец уби двајца Израелци и тешко рани четворица во напад во населбата Ариел на окупираниот Западен Брег, пред да биде застрелан и убиен од израелските безбедносни сили, објавија израелските болничари и палестинските власти.
Израелските болничари потврдија дека двајца Израелци загинале во населбата Ариел, а четворица ранети Израелци се хоспитализирани и се во тешка состојба, пренесе АП.
Израелската армија соопшти дека Палестинец нападнал Израелци на влезот во индустриската зона на населбата Ариел, а потоа отишол до блиската бензинска пумпа и таму со нож нападнал повеќе луѓе.
Според првите извештаи на израелските медиуми, Палестинецот се обидел да избега од местото на настанот и со својот автомобил истрчал на соседниот автопат, се судрил со возила од спротивниот правец, а потоа избегал од возилото.
Израелските сили убиле Палестинец додека се обидувал да побегне.
Израелскиот премиер Јаир Лапид упати сочувство до семејствата на загинатите во нападот, наведувајќи дека Израел постојано и со полна сила се бори против теророт.
Нападот е последен во серијата израелско-палестински судири на Западниот Брег и Источен Ерусалим во кои оваа година загинаа најмалку 23 Израелци и повеќе од 130 Палестинци.