Голем пожар денеска изби во атарот на селото Војник во Општина Старо Нагоричане, каде според неофицијални проценки е изгорена површина од неколку стотици хектари.
Како што информираше заменик градоначалникот на Општина Бобан Цветановски, опожарени се ниви, стрништа, куќи викендици, лозја…
– Пожар има во маалото Трендајловци, село Младо Нагоричане, во близина на „Етносело“. Огнената стихија брзо се шири. Побаравме помош од Куманово и Ранковце, но и таму има активни пожари. Зафатени се куќи, викендички, големи површини со необработено земјиште, изјави Цветановски.
На терен пожарникарите мака мачеа и со огнот и со ветерот кој постојано го разгоруваше. Гореше од месноста „Брацо“ па се до локалитетот „Визиана“.
Според неофицијални информации во близина на пожарот поради густ чад се случила и тешка сообраќајна незгода, но за ова се уште чекаме официјална потврда од СВР Куманово.
Противпожарната единица на Старо Нагоричане располага со само две возила, а на терен беа голем број локални жители со трактори, како и доброволци од Куманово, кои се вклучија во гаснењето на пожарот.
Никола Ивановски