Кети Хочул, гувернерката на државата Њујорк, ќе стави на располагање 750 војници на Националната гарда на њујоршката полиција кои ќе ги прегледуваат торбите на патниците на најфреквентните станици на метрото со цел да се подобри безбедноста, пренесува Хина.
Ним, како што додаде Хочул, ќе им се придружат 250 членови на полицијата на државата Њујорк и полицијата на државната управа за транспорт (МТА), која конкретно ја надгледува Железничката станица (Гранд централен терминал) и станицата Пен.
Хочул ја донесе оваа одлука по неодамнешните напади врз патниците во метрото кои го привлекоа вниманието на јавноста.
Иако криминалот во февруари падна за 15 отсто во споредба со истиот месец минатата година, Хочул, демократ, смета дека статистиката нема да им помогне на патниците да се чувствуваат побезбедно.
Заедничка контрола
„Нема да им олесни на луѓето ако им кажете дека работите се подобруваат, особено кога штотуку сте слушнале дека некој бил избоден и прободен со нож во грлото или турнат на шините. Тоа е психолошки ефект“, изјави Хочул.
Војниците од Њујоршката Национална гарда, воена единица која заеднички ја контролираат федералните и државните лидери, немаат мирнодопски овластувања за апсење, но ќе им помагаат на полицајците кои имаат.
Градоначалникот на Њујорк, Ерик Адамс, исто така демократ кој некогаш патролирал во метрото како полицаец, распореди дополнителни 1.000 полицајци откако беа пријавени повеќе напади и кражби во јануари.
Иако истакнува дека криминалот во њујоршкото метро е редок, со околу шест прекршоци дневно, главно кражби, сепак одлучил да ги врати чековите на чантите и ранците од претпазливост.