Ако САД не можат да го платат својот долг, тоа ќе има многу сериозни последици не само за САД, туку и за глобалната економија.
Ова го изјави Џули Козак, директорка за комуникации на Меѓународниот монетарен фонд (ММФ).
Козак истакна дека заканата за САД од неможноста за исполнување на обврските настанала во тежок момент за глобалната економија.
Таа ги повика американските власти да се обединат и да постигнат консензус за итно решение на ова прашање.
Претходно американскиот претседател Џо Бајден изјави дека евентуалното прогласување на неплаќање од страна на американската влада може да се претвори во катастрофа.
Според него, во овој случај американската економија ќе западне во длабока рецесија, сметките на пензионерите ќе бидат празни, речиси 8 милиони луѓе ќе останат без работа, а меѓународниот углед на Вашингтон ќе биде нарушен.
Експертите сметаат дека зголемувањето на горната граница на јавниот долг треба да го спречи овој исход.
Сепак, републиканците и демократите сè уште не можат да се договорат за условите на таквата иницијатива.
Министерството за финансии предупреди дека остануваат само три недели за договор на властите на Соединетите Американски Држави, бидејќи до 1 јуни земјата нема со што да ги плати сметките, пренесува rt.rs.
– САД ризикуваат да се соочат со сериозни последици доколку не ги исполнат своите обврски, изјави претседателот Џо Бајден по средбата со лидерите на американскиот Конгрес.
Шефот на Белата куќа разговараше за можноста за подигање на горната граница на националниот долг за време на минатите разговори со конгресмени.
– Учесниците на дискусијата, сепак, не успеаја да постигнат напредок по ова прашање, најави по средбата претседателот на Претставничкиот дом, Кевин Мекарти.
Според американското Министерство за финансии, во 2022 година државниот долг на САД ќе се зголеми за 1,8 трилиони долари и ќе ја надмине границата од 31,4 трилиони долари поставена од властите.
Владата почна да останува без пари за да ги исполни своите обврски, а во јануари 2023 година Министерството за финансии најави итни мерки.
Според последните проценки на американското Министерство за финансии, ресурсот на сите преземени мерки може да биде целосно исцрпен до 1 јуни.
Затоа, раководството на земјата има само три недели да одлучи за плафонот на долгот и, следствено, да избегне неплаќање.
Кон крајот на април, републиканците постигнаа мнозински консензус за нивниот плафон на долгот во Долниот дом на Конгресот.
Авторите на документот се согласуваат да ја зголемат границата за 1,5 трилиони долари, но истовремено бараат намалување на буџетските трошоци за 4,8 трилиони долари.
Предлагаат враќање во буџетот на непотрошените средства за борба против ковид-19, укинување на отписите на долгови за образовни кредити и укинување на даночните кредити според законот за намалување на инфлацијата.
Сепак, според експертите, иницијативата веројатно нема да добие поддршка во Сенатот, кој е под контрола на демократите.
Партиските функционери предводени од Џо Бајден инсистираат на зголемување на плафонот на долгот без никакви дополнителни услови.
Во оваа насока, шефот на Белата куќа го нарече предлог-законот од републиканците „неодржлив“, пишува rt.rs.
Сите информации за економско-енергетската криза во Македонија, регионот и светот можете да ги прочитате ТУКА.