Монетите кои туристите ги фрлаат во познатата римска Фонтана ди Треви, заради здравје или љубов и среќа, се вадат од барокната фонтана два пати месечно.
Потоа парите се носат во хуманитарната организација на Католичката црква, Каритас.
Оваа организација потоа ги брои ситните пари од фонтаната и ги користи за финансирање на народна кујна и проекти за општествено корисна работа, според Ројтерс.
Каритас собрале 1,4 милиони евра од фонтаната во 2022 година, а се очекува да се соберат повеќе пари во текот на претходната година, најмногу поради легендата дека ако монета се фрли во Фонтаната ди Треви со десната рака преку левото рамо, враќањето во Рим е загарантирано.
Накит, протези, религиозни симболи, па дури и папочна врвца се отстрануваат од фонтаната, која се исцедува за чистење двапати месечно.
Вадењето монети е интересен настан, во кој се вклучени четворица работници на регионалното комунално претпријатие АЦЕА, кои балансираат на работ на големата фонтана, користејќи долги метли и црева за вшмукување.
Монетите потоа се предаваат на Каритас, каде што се сушат со фен, се сортираат и се бројат.
Таблите околу фонтаната објаснуваат дека монетите се наменети за добротворни цели, а земањето кусур од фонтаната е казниво.
Рим е еден од најпосетуваните градови во светот, со околу 21 милион туристи годишно, а Фонтаната ди Треви, завршена во средината на 18 век, прикажува статуа на Тритон преку која ја илустрира темата за припитомување на водата.
Околу оваа фонтана е фокусирана една од најпознатите филмски сцени од делото на режисерот Федерико Фелини „La Dolce Vita“, во која влегува Анита Екберг и го кани Марчело Мастројани да ѝ се придружи.
Влегувањето во Фонтаната ди Треви денеска е забрането, а туристите кои ќе го прекршат ова правило плаќаат казна.