Кремљ денеска ладнокрвно реагираше на повикот на францускиот претседател Емануел Макрон за примирје во меѓународните конфликти за време на Олимписките игри во Париз, велејќи дека Украина може да го искористи тоа како можност за прегрупирање и повторно вооружување, пренесува Ројтерс.
Олимписко примирје
Прекинот на непријателствата според олимпиското примирје е долгогодишна традиција, а Макрон во интервјуто во понеделникот рече дека ќе работи на тоа да го постигне кога Париз ќе биде домаќин на Летните игри од 26 јули до 11 август.
Запрашан за тоа, портпаролот на Кремљ, Дмитриј Песков, рече дека и рускиот претседател Владимир Путин и руската војска забележале дека, по правило, режимот во Киев користи такви идеи и иницијативи за да се обиде да се прегрупира и вооружи.
Тој не наведе ниту еден конкретен пример за вака однесување на Украина.
Војната беснее од 24 февруари 2022 година, кога Путин ја започна, како што рече, „специјалната воена операција“ во Украина, а во тој период немаше прекин на огнот.
Песков не отиде толку далеку што ја отфрли можноста за олимписко примирје, но рече дека сè уште никој не презел никакви официјални чекори во тој поглед.
Русија ја има иницијативата во Украина
Линиите на фронтот во Украина не се поместија драматично од крајот на 2022 година, но Русија ја врати иницијативата откако го зазеде градот Авдијевка во февруари.
Во интервју за француските медиуми, Макрон рече дека Франција ќе направи се за да се постигне примирје во конфликтите во Украина, Газа и Судан и дека за ова прашање ќе го ангажира кинескиот претседател Си Џинпинг.
„Тоа е можност во која ќе се обидам да вклучам многу наши партнери. Кинескиот претседател доаѓа во Париз за неколку недели, ќе го замолам да ми помогне“, рече тој.
Песков, одговарајќи на посебно прашање за Кина, рече дека позицијата на Пекинг за украинскиот конфликт е „многу избалансирана и конструктивна“.
Кина, која не ја осуди инвазијата на Москва и значително ја зајакна трговијата со Русија од почетокот на војната, минатата година поднесе мировна иницијатива која се состоеше од збир на општи принципи кои не вклучуваат специфики за тоа како да се стави крај на конфликтот.
Сите информации поврзани со најновите случувања со војната во Украина можете да ги прочитате ТУКА.