Избирачки места се отворени низ Косово утрово во 7 часот, каде што луѓето ќе гласаат за новата локална власт до 19 часот.
Право на глас имаат 1.885.448 избирачи
На 883 избирачки места се избираат градоначалници и советници во 38 општини. Граѓаните со право на глас имаат право да гласаат само за еден советник.
Централната изборна комисија на Косово потврди дека 1.885.448 избирачи имаат право да гласаат на локалните избори, додека 15.532 гласачи надвор од Косово се пријавиле за да гласаат по поштенски пат.
Ангажирани се околу 3.000 полицајци за одржување на нормалниот тек на изборите, додека 35 судии и 80 обвинители се на должност.
Процесот на гласање се одвива под мерки против ширење на пандемијата од КОВИД-19, со употреба на маски и одржување физичка дистанца.
Владата на Косово одлучи од сабота од 22 часот до 5 часот наутро во понеделник, ограничувањето на движењето што е во сила поради пандемијата да не се однесува на лица кои се официјално ангажирани во организацијата и спроведувањето на изборниот процес.
Ова вклучува 15.000 членови на избирачкото место и околу 25.000 набудувачи на изборниот процес.
Во исто време, Министерството за образование одлучи во понеделник да не се одржуваат физички часови во училиштата каде што се наоѓаат избирачките места, туку часови преку интернет за да има време училиштата да се дезинфицираат.
На локалните избори учествуваат 89 политички субјекти, од кои 32 се политички партии, 33 се граѓански иницијативи, еден е изборна коалиција и 23 се независни кандидати.
Седми избори за општински собранија
Вкупно 166 кандидати се кандидираат за градоначалници во 38 општини, од кои 14 се жени, додека 5.198 кандидати се пријавиле за општински советници.
Изборната кампања траеше 30 дена, а Демократијата на дело (ДНД), мрежа на организации што ги следат изборите во Косово, рече дека мерките за борба против пандемијата на коронавирус се слабо почитувани, но дека добар дел од кампањата е префрлен на социјални мрежи.
Евентуалниот втор круг од изборите за градоначалници, доколку ниту еден кандидат не освои повеќе од 50 проценти од гласовите во првиот круг, ќе се одржи на 14 ноември. Општинската влада се избира со мандат од четири години.
Ова се седми избори за општински собранија од крајот на војната во Косово во јуни 1999 година, додека претседателите на општините или градоначалниците се директно избрани од 2007 година.