Лидерите на Европската унија, кои денеска се состануваат, имаат неколку важни теми, од кои се издвојуваат конфликтот на Блискиот Исток меѓу Израел и Хамас и континуираната поддршка на Украина во нејзината војна против руската агресија.
Претседателот на Европскиот совет, Шарл Мишел, во писмото со покана до членовите на Советот, наведува дека самитот се одржува во време на голема глобална нестабилност и несигурност, која во последно време е влошена од настаните на Блискиот Исток, што бара итно внимание.
Тоа е прв самит на Европскиот совет по нападот на Израел на 7 октомври од страна на палестинската милитантна група Хамас и одмаздата на Израел со постојаното бомбардирање и блокада на Појасот Газа, управуван од Хамас.
Додека сите земји од ЕУ остро го осудија нападот на Хамас и изразија загриженост за хуманитарната ситуација во Појасот Газа, постојат разлики во нагласувањето на правото на Израел на самоодбрана, односно грижата за палестинските цивили, пренесува Ројтерс.
Пред самитот, земјите од ЕУ беа поделени околу тоа дали да повикаат на „хуманитарна пауза“ во конфликтот, при што некои тврдат дека таквата мерка е од витално значење за добивање помош за Газа, додека други веруваат дека тоа би можело да ја ограничи способноста на Израел да се брани.
Дипломатите кои разговараа за Ројтерс рекоа дека ЕУ се согласила на компромисен повик за „паузи“ во конфликтот, бидејќи укажува на повеќе кратки паузи во борбите за конкретни мисии, како што се ослободување заложници или хуманитарни конвои, наместо формален прекин на огнот.
Лидерите на ЕУ, вклучително и францускиот претседател Емануел Макрон и германскиот канцелар Олаф Шолц, го посетија Блискиот Исток за да изразат солидарност со Израел и да ги зајакнат дипломатските напори за спречување на конфликтот да ескалира во регионална војна.
Иако влијанието на ЕУ врз конфликтот е скромно, официјалните лица стравуваат дека ескалацијата може да има сериозни последици за Европа, вклучително и зголемени тензии во заедницата, можни напади од исламистите и голем прилив на бегалци.
Кога станува збор за Украина, Мишел во писмото со покана вели дека ЕУ ќе продолжи со својата непоколеблива поддршка за таа земја, се додека е потребно.
Украинскиот претседател Володимир Зеленски ќе се обрати на самитот преку видео врска, а поддршката за Киев ќе биде во првите редови на декларацијата од самитот.
ЕУ и нејзините земји-членки испратија милијарди евра помош за Украина по нападот на руските сили во февруари минатата година.
Некои официјални претставници и дипломати изразија страв дека Украина сега може да изгуби дел од политичкото внимание и ресурси од Западот, особено од САД, поради новата криза на Блискиот Исток.
Самитот нема да може да ги формализира плановите за финансиска помош од 50 милијарди евра и повеќе од 20 милијарди евра воена помош за Украина, бидејќи тие се дел од пошироката дискусија за буџетот што властите се надеваат дека ќе ја завршат до крајот на годината, според до Ројтерс.
На самитот лидерите ќе ја имаат првата дебата за буџетскиот пакет, за кој дипломатите очекуваат дека ќе биде спорно.
Европската комисија побара и дополнителни 15 милијарди евра за решавање на проблемот со миграцијата и дополнителни средства за покривање на зголемените трошоци на заедничкиот долг на ЕУ во ситуација кога каматните стапки растат.
Претседателот на Европскиот совет, Шарл Мишел, најави дека една од темите на денешниот самит ќе бидат односите меѓу Белград и Приштина, пренесува Танјуг.
Сите информации поврзани со најновите случувања со војната во Украина можете да ги прочитате ТУКА.