Предлозите на Москва за решавање на проблемите во Украина му се добро познати на Киев, а Украина или ќе ги исполни за свое добро или за тоа ќе одлучи руската армија, изјави рускиот министер за надворешни работи Сергеј Лавров за агенцијата Тасс.
„Нашите предлози за демилитаризација и денацификација на териториите под контрола на режимот, отстранување на заканите за безбедноста на Русија кои доаѓаат од таму, вклучително и нашите нови територии, му се добро познати на непријателот. Значењето е едноставно. Следете ги за ваше добро. Во спротивно, за прашањето ќе одлучува руската армија“, изјави Лавров во понеделникот вечерта, цитирана од државната новинска агенција.
Официјална Москва својата инвазија на Украина ја нарекува „специјална воена операција“ за „демилитаризација“ и „деназификација“ на својот сосед. Киев и неговите западни сојузници тоа го нарекуваат агресија во империјален стил чија цел е заземање на земјата, потсетува Ројтерс.
„Топката е во дворот на режимот“
Во септември, Москва објави анексија на четири украински провинции – Доњецк, Луганск, Запорожје и Херсон, откако одржа референдум што Киев и неговите сојузници го отфрлија како лажен и незаконски.
Рускиот претседател Владимир Путин во неделата изјави дека Русија е подготвена да преговара со сите страни вклучени во војната во Украина, но дека Киев и неговите западни поддржувачи ги отфрлија преговорите.
И Киев и Вашингтон оценуваат дека Русија не сака преговори, додека Москва не одговара на украинските предуслови, кои вклучуваат целосно повлекување на руските војници од Украина, вклучувајќи го и Крим, кој беше окупиран во 2014 година.
Лавров изјави за Тас дека кога станува збор за тоа колку долго ќе трае конфликтот, „топката е во дворот на режимот, а Вашингтон стои зад неа“.
Сите информации поврзани со најновите случувања со војната во Украина можете да ги прочитате ТУКА.