Бројот на Русите убиени во војната во Украина е повеќе од 50.000, покажува анализата на британскиот Би-Би-Си.
Истражувањето покажува и дека четвртина повеќе војници загинале во втората година од руската инвазија отколку во првите 12 месеци.
Повеќе од 27.300 руски војници загинаа во втората година од конфликтот, што е доказ дека „територијалните придобивки дојдоа по огромна човечка цена“, пишува Би-Би-Си.
Терминот „машина за месо“ се користи за да се опише начинот на кој Москва немилосрдно испраќа бранови војници во обид да ги истроши украинските сили, пишува британскиот јавен сервис.
Вкупниот број на смртни случаи (повеќе од 50.000) е осум пати поголем од единственото официјално јавно признание за бројот на загинати што Москва го објави од септември 2022 година.
И покрај анализата, Би-Би-Си сугерира дека реалниот број на руски жртви најверојатно ќе биде многу поголем, бидејќи нивната анализа не ги вклучува смртните случаи на милиции во Доњецк и Луганск – во источна Украина, кои беа окупирани од Русите.
Украина, пак, ретко коментира за размерите на жртвите на бојното поле.
Во февруари, претседателот на таа земја, Володимир Зеленски, рече дека се убиени 31.000 украински војници – но проценките, врз основа на американските разузнавачки служби, укажуваат на поголеми загуби.
Значителен скок на жртви може да се забележи во пролетта 2023 година, за време на битката кај Бахмут, кога група платеници, Вагнер, ѝ помогна на Русија да го заземе тој град.
Водачот на Вагнер, Евгениј Пригожин, ги процени загубите на неговата група во тоа време на 22.000 борци.
Руското заземање на Авдиивка во источна Украина минатата есен, исто така, доведе до нов скок во воените смртни случаи.
Големата руска инвазија на соседна Украина започна на 24 февруари 2022 година во четири часот наутро.
Владимир Путин објави долг говор во кој објасни зошто одлучил да започне, како што Москва го нарекува „специјална воена операција“ и да изврши воена агресија против суверена земја.
Две години подоцна, војната се уште трае.