Кинескиот извоз драстично падна во мај, покажаа податоците на царината во средата, што ја одразува слабата странска побарувачка во услови на построга монетарна политика и висока инфлација во голем број развиени економии.
Извозот е намален за 7,5 отсто во мај во однос на истиот месец лани, што е најсилно од јануари. Во април скокна за 8,5 отсто.
Минатиот месец е намален и увозот, за 4,5 отсто во однос на мај лани, по падот од 7,9 отсто во април.
Податоците покажуваат послаба побарувачка за суровини и поблаг раст на увозот на јаглен поради послабата побарувачка во секторите за производство на електрична енергија и челик.
Во март го достигна највисокото ниво во последните 15 месеци.
Увозот на бакар падна за 4,6 отсто.
Кинеската економија порасна за 4,5 отсто во првиот квартал во споредба со истиот период минатата година, благодарение на укинувањето на строгите мерки за ограничување на Ковид-19, но заводот за статистика предупреди на „недоволна“ домашна побарувачка и „сложена“ меѓународна средина.
Главна основа на растот беше услужниот сектор, додека индустријата ослабе поради послабата побарувачка во САД и Европа во услови на зголемени каматни стапки со кои централните банки се обидуваат да ја запрат високата инфлација.
Светска банка проценува дека кинеската економија годинава ќе порасне за 5,6 отсто, што е за 1,3 процентни поени посилно отколку што очекуваа во јануари.
Во 2024 година растот би требало да забави до 4,6 отсто, бидејќи послабата потрошувачка ќе го надмине малото забрзување на извозот.