Кина силно ја осуди овонеделната посета на литвански официјални лица на Тајван и ќе преземе контрамерки против таа провокација, изјави Ванг Венбин, портпарол на кинеското Министерство за надворешни работи, како што пренесува China Media Group (CMG).
„Силно го осудуваме намерното кршење на суверенитетот на Кина од страна на литванските антикинески сили и мешањето во внатрешните работи на Кина“, рече Ванг во четвртокот во Пекинг.
Принципот на „една Кина“ е основна норма на меѓународните односи и политичка основа за развој на билатералните односи меѓу Кина и сите други земји, вклучително и Литванија“.
Цитирајќи ја заедничката изјава за воспоставување дипломатски односи меѓу Народна Република Кина и Република Литванија, Ванг рече дека Владата на Литванија признава дека Владата на Народна Република Кина е единствената легална влада во Кина и дека Тајван е неотуѓив дел од територијата на Кина.
Литванската влада, исто така, вети дека нема да воспоставува официјални односи и размена со тајванските власти, се вели во заедничката изјава, но Литванија постојано ги прекрши своите ветувања, рече Ванг.
Кина ги повика литванските власти да не ја поддржуваат независноста на Тајван и антикинеските сили и да не продолжат по погрешниот пат, додаде Ванг.
Делегација предводена од заменик-министерот за транспорт и врски на Литванија Агне Ваичукевичиус оваа недела го посети Тајван, според ЦМГ.
Сите информации поврзани со најновите случувања во Тајван можете да ги прочитате ТУКА.