На 29 ноември 1944 година на масовниот собир во салата на некогашното Кино „Напредок“ било решено во Куманово да се отвори градска библиотека.
Веднаш по донесувањето на одлуката се пристапило кон собирање книги, кои граѓаните ги давале доброволно и за неполни месец дена биле собрани околу 600 книги со кои започнала да работи Библиотеката „Тане Георгиевски“.
Во времето кога се раѓала оваа установа, во времето кога градот бил разурнат и опустошен и биле доделени работни простории. Во првите години од своето постоење кумановската библиотека намала платени библиотекари и книгите ги издавале напредни младинци кои работеле со голем ентузијазам.
При крајот на 1949 година библиотеката за прв пат добила платен библиотекар – Лепа Стојчевска, која започнала да се грижи за збогатувањето на книжевниот фонд и во тоа време оваа мала културна установа располагала со книжен фонд од 1.274 книги.
Од тогаш може да се каже дека започнуваат добрите денови и перманентно секоја година се зголемува книжениот фонд, паралелно со тоа и бројот на читали кои се почесто ја посетуваат оваа единствена културна институција во Куманово.
Веќе во 1967 година Библиотеката „Тане Георгиевски“ имала 62.000 книги и 10 работници. Тогаш имало и четири клонови на библиотеката во селски средини, а секој од нив располагал со по 1.500 книги.
Во истата година биле прочитани над 120.000 книги.
Извор: „Наш весник“ број 147 (сабота, 11. ноември 1967. година)