Американскиот потпретседател Камала Харис рече дека Северна Кореја е земја со „брутална диктатура“, нелегална програма за оружје и широко распространето кршење на човековите права за време на посетата на границата меѓу двете Кореи.
Во нејзината прва посета на демилитаризираната зона што ги дели двете Кореи, Харис рече дека силно вооружената граница е јасен пример за „драматично различните патеки“ што ги следат двете земји.
„На север гледаме брутална диктатура, широко распространето кршење на човековите права и нелегална програма за оружје што ги загрозува мирот и стабилноста“, рече таа.
„САД и светот сакаат стабилен и мирен Корејски Полуостров каде Демократската Народна Република Кореја (Северна Кореја) повеќе не е закана“, рече таа.
Харис ја посети демилитаризираната зона по пристигнувањето во Сеул рано во четвртокот, во услови на зголемени регионални тензии поради ракетните тестови на Северна Кореја и кинеските потези во Тајванскиот теснец.
Се стравува дека Северна Кореја наскоро би можела да тестира нуклеарно оружје.
Јужна Кореја тврди дека ги завршила подготовките за тестот, седми од 2006 година и прв од 2017 година.
Харис разговараше со јужнокорејскиот претседател Јун Сук-Јол.
Заедно, тие ја осудија засилената нуклеарна реторика на Северна Кореја и нејзината серија ракетни тестови, најновите во средата.
Тие, исто така, ја повторија заедничката цел за целосна денуклеаризација на Корејскиот полуостров, соопшти Белата куќа.
Харис потврди дека САД се посветени на одвраќање на Северна Кореја, вклучително и „целиот опсег на американски одбранбени способности“.
Канцеларијата на Јун соопшти дека во случај на сериозна провокација од Северна Кореја како нуклеарна проба, тој и Харис се согласиле веднаш да спроведат „заеднички подготвени контрамерки“, без да прецизираат кои ќе бидат тие.
На почетокот на овој месец Северна Кореја донесе нов закон во кој го внесе правото да користи превентивни нуклеарни напади.
Кога станува збор за Тајван, Харис нагласи дека напорите за зачувување на мирот и стабилноста во Тајванскиот теснец се „клучен елемент на слободен и отворен Индо-Пацифик“, објави Белата куќа.
Во интервју за Си-Ен-Ен објавено во неделата, Јун рече дека во случај на конфликт околу Тајван, поверојатно е дека Северна Кореја ќе започне провокација и дека Сеул и Вашингтон треба прво да се фокусираат на тоа.
Посетата на Харис на демилитаризираната зона, прва од официјален претставник на администрацијата на Бајден, имаше за цел да ја покаже непоколебливата безбедносна посветеност на Америка кон Јужна Кореја, рекоа нејзините помошници.
Северна Кореја истрела две ракети со краток дострел во средата, нејзино второ тестирање од неделата, додека Јужна Кореја и САД одржуваат поморски вежби во кои учествува и носач на авиони.
Морнариците на Јужна Кореја и Јапонија соопштија дека ќе одржат трилатерални анти-подморнички вежби со американските сили во петок за да ја подобрат нивната способност да се спротивстават на севернокорејските закани, вклучително и балистички ракети лансирани од подморница.
Ќе учествуваат американскиот носач на авиони УСС Роналд Реган, крстосувачот со наведувана ракета УСС Ченселорсвил, разурнувачот на наведувани ракети УСС Бари, јужнокорејскиот разурнувач Мунму и јапонскиот танкер Асахи.