Ирански проектили и дронови синоќа погодија бази на иранските курдски опозициски групи во Ирак, соопштија членови на курдската партија.
Демократската партија на Ирански Курдистан, курдска иранска група во егзил во Ирак, соопшти дека ирански ракети земја-земја и дронови ги погодиле нејзините бази и блиските бегалски кампови во Која и Џединкан.
Групата, исто така, рече дека болницата во Који била погодена во нападите.
Не е наведено дали има жртви.
Веб-страницата на иранската паравоена револуционерна гарда денеска потврди дека е извршена „нова рунда“ ракетни и беспилотни напади против „сепаратистите и терористите“ во северен Ирак.
Некои курдски групи водеа конфликт со низок интензитет со Техеран од Исламската револуција во Иран во 1979 година, а многу членови во политички егзил воспоставија бази во соседен Ирак.
Иран вели дека групите поттикнуваат антивладини протести во Иран и шверцуваат оружје во земјата, што курдските групи го негираа.
За време на посетата на Багдад минатата недела, командантот на иранските сили Кудс Есмаил Гани му се закани на Ирак со копнена воена операција на северот на земјата доколку ирачката армија не ја зајакне заедничката граница против курдските опозициски групи, изјавија ирачки и курдски претставници.
САД ги осудија најновите ирански напади. Генералот Мајкл Курила, кој ја предводи американската Централна команда, рече дека таквите недискриминирачки и незаконски напади „ги ставаат на ризик цивилите, го нарушуваат ирачкиот суверенитет и ја загрозуваат тешко стекнатата безбедност и стабилност на Ирак и на Блискиот Исток“.
Иранските напади во северен Ирак дојдоа еден ден откако Турција изврши воздушни напади во северните области на Сирија и Ирак, насочени кон курдските групи кои Анкара ги смета за одговорни за минатонеделното бомбардирање во Истанбул.