Ситуацијата во регионот Харков е тешка, но и покрај тоа, украинските сили ги одбиваат руските напади и во текот на минатата недела повторно зазедоа неколку квадратни километри на источниот фронт, изјави денеска заменик-министерката за одбрана на Украина, Хана Маљар.
„Ситуацијата во правец на Купјанск е тешка. Непријателот не се откажува од плановите за напредување и внесува дополнителни сили“, рече Маљар, пренесе Ројтерс.
Украинската војска минатата недела објави дека Русија го напаѓа Купјанск, град во областа Харков.
Маљар изјави дека украинските сили напредуваат јужно од Бахмут, кој во мај беше заробен од руските сили по тешките месеци борби и дека во текот на изминатата недела ослободиле уште три квадратни километри во таа насока.
Таа додаде дека нема значителни промени на југот, каде што украинските сили се обидуваат да ги пробијат руските трупи и да стигнат до Азовското Море.
„Не треба да го потценуваме непријателот. Треба да бидеме трпеливи и да ги поддржиме нашите вооружени сили“, рече Маљар.
Украинската армија минатата недела објави дека постигнала успех на југоисточниот фронт, но неименуван американски функционер истакна дека нема големи изгледи за украинските сили да го вратат стратешки важниот град Мелитопол, кој е под контрола на Русија, пишува Ројтерс.
Сите информации поврзани со најновите случувања со војната во Украина можете да ги прочитате ТУКА.