Израелските сили денеска се судираат со Хамас среде урнатините на градот Газа, додека околу 80 земји и организации се состануваат во Париз за да ја координираат хуманитарната помош и да најдат начини да им помогнат на ранетите цивили.
Жителите на градот Газа изјавија дека Израелците се борат против Хамас и дека тенкови се распоредени околу градот.
Тие исто така рекоа дека израелските сили се приближуваат до две болници, каде засолниште побараа илјадници раселени Палестинци.
Израелската армија тврди дека нејзините сили напреднале во срцето на градот Газа, главното упориште на Хамас и најголемиот град во палестинската крајбрежна енклава, додека Хамас вели дека неговите борци ѝ нанеле големи загуби на израелската армија.
Вооруженото крило на Хамас вчера објави видео на кое се чини дека се прикажани интензивни улични борби покрај бомбардирани згради во градот Газа.
Израелските тенкови наидоа на силен отпор од борците на Хамас кои користат подземни тунели за да поставуваат заседи, велат извори од Хамас и Исламски џихад.
Додека војната меѓу Израел и Хамас трае повеќе од еден месец, САД рекоа дека Палестинците мора да управуваат со Газа по завршувањето на конфликтот.
Американскиот државен секретар Ентони Блинкен вчера ги истакна „црвените линии“ и очекувањата на Вашингтон за опколената крајбрежна територија, што е одговор на коментарите на Тел Авив дека ќе биде одговорен за безбедноста во Газа на неодредено време.
Не треба да има „повторна окупација на Газа по завршувањето на конфликтот. Нема обид за блокада или опсада на Газа. Нема намалување на териториите на Газа“, рече Блинкен на прес-конференција во Токио.
Блинкен рече дека можеби е потребен „некој преоден период“ на крајот на конфликтот, но дека управувањето со Газа по кризата мора да ја вклучи палестинската страна.
„Тоа мора да вклучува владеење со палестинското раководство и Газа обединета со Западниот Брег под палестинската управа.“
Палестинската управа, која има ограничена автономија во делови од Западниот Брег под израелска окупација, тврди дека Појасот Газа, каде Хамас владее од 2007 година, е составен дел на идната палестинска држава.
Израелските власти појаснија дека немаат намера да ја окупираат Газа по војната, но дека сепак треба да разјаснат како би можеле да обезбедат безбедност без воено присуство.
Палестинските власти во средата соопштија дека во израелските напади загинале 10.569 луѓе, од кои 40 отсто биле деца. Израел тврди дека 33 негови војници биле убиени.
Hamas published another video of the ongoing battle with the invading Israeli forces
Hamas will end up destroying more Israeli armored vehicles than Hezbollah did in the 2006 war pic.twitter.com/i0tJuZlfhq
— Iran Observer (@IranObserver0) November 8, 2023