Француската премиерка вели дека планот на владата за зголемување на старосната граница за пензионирање од 62 на 64 години „повеќе не може да се преговара“, што дополнително ги налути парламентарните противници и синдикатите кои планираат дополнителни масовни протести и штрајкови оваа недела.
Зголемувањето на старосната граница за пензионирање е дел од широкиот предлог-закон кој е главна мерка за вториот мандат на претседателот Емануел Макрон.
Предлог-законот се соочува со голем отпор од јавноста. Повеќе од милион луѓе маршираа против него претходно овој месец.
Во интервју за радиото Франс-Инфо емитувано во неделата, премиерката Елизабет Борн рече дека возраста за пензионирање „повеќе не може да се преговара“.
„Пензионирањето на 64 години и зголемувањето на бројот на години потребни за да се заработи целосна пензија „е компромисот што го предложивме откако ги слушнавме организациите и синдикатите на работодавачите, рече Елизабет Борн.
Пратеникот Мануел Бомпар, чија партија Непобедлива Франција го предводи парламентарниот притисок против реформите, повика на „најголем можен“ одѕив за претстојните штрајкови и протести.
„Мораме да бидеме на улица во вторник“, изјави тој за телевизијата БФМ.
Владата вели дека реформата е неопходна за да се задржи солвентниот пензиски систем бидејќи очекуваниот животен век во Франција е зголемен, а стапката на наталитет е намалена.
„Нашата цел е да обезбедиме во 2030 година да имаме систем кој е финансиски избалансиран“, рече Борн.
Синдикатите и левичарските партии сакаат големите компании и побогатите домаќинства да инвестираат повеќе за да го балансираат пензискиот буџет.
Предлог-законот оди во парламентарната комисија во понеделник, а на целосна расправа во Националното собрание на 6 февруари.
Противниците поднесоа 7.000 предложени амандмани кои дополнително ќе ја комплицираат расправата.