Започнати се две пилот програми за подобрување на граничната контрола на ЕУ со Бугарија и Романија, соопшти Европската комисија.
„Зајакнувањето на надворешните граници со зголемени мерки за надзор што треба да се спроведат на бугарско-турската граница е клучен приоритет“, се наведува во соопштението за печатот на Комисијата.
Бугарскиот проект, започнат во понеделникот, предвидува обезбедување на границата меѓу земјата на ЕУ и Турција со возила, камери, патишта и караули, според претходните најави на претседателката на Европската комисија Урсула фон дер Лајен.
Проектите беа објавени на самитот на ЕУ пред еден месец.
Силна оперативна, техничка и финансиска поддршка
Друг пилот проект, започнат во петокот во Романија, се фокусира на репатријација, управување со границите и меѓународна соработка.
Ќе се спроведува со силна оперативна, техничка и финансиска поддршка од ЕК и клучните агенции на ЕУ како Европол и Фронтекс.
Миграцијата во Европската унија повторно се зголеми минатата година, што ги натера лидерите на ЕУ да преземат чекори за ограничување на пристигнувањата во блокот и да свикаат специјален самит за ова прашање минатиот месец.