Топлинските бранови, сушите и поплавите што го одбележаа летото 2025 година предизвикаа загуби од 43 милијарди евра за европската економија, според студија објавена денес од економисти, во која се нагласува дека овие непосредни трошоци се само почеток.
Студијата, предводена од Сехриш Усман од германскиот Универзитет во Манхајм со двајца коавтори од Европската централна банка, се потпира и на метеоролошки податоци и на економски модели за да ја процени штетата предизвикана од екстремните временски настани, кои климатските промени ги прават почести и поинтензивни.
Студијата ги зеде предвид директните последици како што се уништувањето на патиштата, зградите или посевите за време на поплавите, како и индиректните како што се загубите на производството предизвикани од времето потребно за обнова на фабрика, губењето на животи и трошоците за адаптација.
Истражувањето, исто така, вклучуваше долгорочни влијанија бидејќи „вистинските трошоци на екстремните настани се протегаат далеку над нивните непосредни ефекти“, рече Сехриш Усман.
Таа како пример го наведе недостигот или уништувањето на одредени производи кои се поврзани со сушата и можат да доведат до инфлација на повеќе или помалку долг рок.
Земајќи ги предвид сите овие елементи, студијата проценува дека до 2029 година, макроекономските трошоци настанати од катастрофите од летото 2025 година би можеле да достигнат 126 милијарди евра.
Шпанија, Франција и Италија се издвојуваат како најпогодени земји, секоја од нив соочена со загуби што надминуваат 10 милијарди евра оваа година.
Овие загуби би можеле да надминат 30 милијарди евра на среден рок, бидејќи ова лето се забележува зголемување на топлотните бранови и сушите.
Земјите од Централна и Северна Европа претрпуваат помалку значајни штети, но поплавите имаат тенденција да се зголемуваат во последните години, што треба да ги зголеми трошоците за временските нарушувања, се забележува во студијата.