Продажбата на уметничката колекција на ко-основачот на Мајкрософт Пол Ален, кој почина во 2018 година, во Кристи во Њујорк, ја надмина историската граница од 1 милијарда долари, со низа рекордни цени за делата на Ван Гог, Сезан и Гоген.
И покрај економската неизвесност поради војната во Украина и инфлацијата, пет слики беа меѓу малата група дела продадени за повеќе од 100 милиони долари на аукција одржана во Центарот Рокфелер на Менхетен, потврдувајќи дека уметничкиот пазар сè уште напредува.
Најскапиот од сите, „Позери, заедно (мала верзија)“ на Жорж-Пјер Сеура од 1888 година, кој се смета за ремек-дело на поентилизмот, е продаден за 149,24 милиони долари, според аукциската куќа Кристи.
Таа најави и дека вкупната сума од продажбата ќе биде наменета за хуманитарни потреби.
И покрај спорот со Бил Гејтс, со кого го основаше Мајкрософт во 1975 година, американскиот милијардер Пол Ален го потпиша „Giving Pledge“ во 2009 година, обврзувајќи се најголемиот дел од своето богатство да го даде во добротворни цели.
Само 60 од 150-те лотови беа продадени во среда, останатите ќе им бидат понудени на купувачите денеска.
Статуата „Венецијанец III“ на Алберт Џакомети е продадена за 25 милиони долари.
Скулптурата на германско-американскиот уметник Макс Ернст „Играта на кралот и кралицата“ беше продадена за 24,3 милиони долари, а на аукцијата беа прикажани и дела од сликари како Диего Ривера, Лусијан Фројд, Винсент Ван Гог и Пол Гоген, чија слика од тахитскиот период „Породилно II“ (1899) продаден за 105,73 милиони долари.
„Букова шума“ на Густав Климт достигна цена од 104,5 милиони долари, што е уште еден рекорд.
Овој „дожд“ од рекорди сведочи за квалитетот на колекцијата собрана од Пол Ален, милијардер со широко поле на интереси, кој основал музеј за поп култура во родниот Сиетл и поседувал неколку спортски франшизи, меѓу кои и Сиетл Сихокс.
Експертите на оваа аукциска куќа истакнуваат дека уметноста е повеќе од кога било безбедно место за инвестирање и покрај неизвесните економски услови.
„Има повеќе милијардери отколку ремек-дела“ на пазарот и „побарувачката е многу разновидна“, со зголемено присуство на клиенти од Азија и Блискиот Исток, рече Адриен Мајер, експерт за модерна уметност во Кристи.