Американскиот претседател Џо Бајден потпиша закон со кој ќе се обезбедат 52,7 милијарди долари субвенции за американското производство и истражување на полупроводници и да се зајакнат напорите да ги направат САД поконкурентни со кинескиот научен и технолошки напредок.
„Иднината ќе биде направена во Америка“, рече Бајден, нарекувајќи го овој чин „инвестиција што се случува еднаш во една генерација во самата Америка“, пренесува Ројтерс.
Некои републиканци му се придружија на Бајден на тревникот во Белата куќа за да бидат сведоци на потпишувањето на нацрт-законот за чипови, кој со години се подготвуваше во Конгресот.
На потпишувањето присуствуваа извршните директори на Micron, Intel, Lockheed Martin, HP и Advanced Micro Devices, како и гувернерите на Пенсилванија и Илиноис, градоначалниците на Детроит, Кливленд и Солт Лејк Сити.
Белата куќа соопшти дека усвојувањето на законот поттикнува нови инвестиции во чипови, истакнувајќи дека Калком се согласил во понеделникот да купи дополнителен удел во њујоршкиот производител на чипови GlobalFoundries за 4,2 милијарди долари, со што вкупната посветеност на таа инвестиција ќе достигне 7,4 милијарди долари до 2028 година.
Производство на чипови
Белата куќа соопшти и дека Микрон најавил инвестиција од 40 милијарди долари во производството на мемориски чипови, со што ќе го зголеми својот удел на американскиот пазар од два на 10 проценти, со оваа инвестиција, како што беше речено, планирана со „предвидени грантови“ од на законот за чипови.
Дел од претставниците беа против овој чин тврдејќи дека претставува подарок за профитабилни компании за производство на чипови, кои претходно затворија фабрики во САД, на што Бајден денеска одговори дека „со овој закон не се делат бланко чекови на компаниите“.
Законот има за цел да го ублажи постојаниот недостиг на чипови, кој влијае на сè, од автомобилската индустрија, оружје, машини за перење до видео игри.
Законот, исто така, вклучува даночен кредит од 25 отсто за инвестиции од фабрики за чипови, во износ од околу 24 милијарди долари.
Законот, предвидува издвојување на 200 милијарди долари во текот на 10 години за поттикнување на научното истражување во САД, за да може земјата подобро да се натпреварува со Кина.
Конгресот допрва треба да усвои специфична легислатива за доделување средства за финансирање на тие инвестиции.