Иранската револуционерна гарда се закани дека ќе „ја прошири војната надвор од регионот“ ако САД повторно го нападнат Иран.
Воените сили објавија дека одговараат на заканите на „американско-ционистичкиот непријател“, откако Доналд Трамп и Џ.Д. Венс вчера предупредија дека би можеле да продолжат со воените напади ако не се постигне мировен договор со иранската влада, пишува Скај њуз.
„Сè уште не ги искористивме сите капацитети на Исламската револуција против нив“, наведе Револуционерната гарда во соопштението.
„Но, ако агресијата против Иран се повтори, ветената регионална војна овој пат ќе се прошири надвор од регионот, а нашите разорни напади на места каде што најмалку очекувате ќе ве доведат до целосно уништување“.
Иран претходно одговори на воените кампањи на САД и Израел со напади врз соседните земји.
Исто така, постои страв од хибридна војна во странство. Лондонската полиција, на пример, истражува врска помеѓу палежите во Лондон и групите поврзани со Иран.
Франција и Велика Британија подготвуваат мисија во Ормускиот теснец
Франција се подготвува за мисија за деминирање во Ормускиот теснец, изјави министерката за вооружените сили на таа земја, Катрин Вотрен.
Таа изјави за француското радио дека „нема сигурност“ дека Иран всушност поставил мини, и покрај извештаите на САД за најмалку десет мини идентификувани во клучниот воден пат.
„Но, во секој случај, се подготвуваме за евентуалната потреба од отстранување на мини“, додаде Вотрен.
Таа објасни дека бродови за деминирање се испраќаат во регионот како дел од евентуална идна француско-британска мисија.