Германскиот министер за одбрана Борис Писториус оцени дека најавеното повлекување на дел од американските трупи од Германија не е изненадување, но нагласи дека стратешката соработка со Соединетите Американски Држави останува силна.
Писториус рече дека одлуката на САД за намалување на военото присуство во Европа „беше очекувана“, но дека тоа не ги менува основните безбедносни односи во рамките на НАТО алијансата, објавува германскиот новински портал Фокус.
Тој истакна дека двете земји продолжуваат со тесната воена соработка, особено преку заеднички бази и команди во Германија.
„Тесно соработуваме со Американците во Рамштајн, Графенвер, Франкфурт и на други места, за мир и безбедност во Европа, за Украина и за заедничко одвраќање“, рече Писториус.
Во исто време, тој истакна дека американските вооружени сили во Германија не се важни само за Европа.
„Од своите бази тука, САД координираат и други воени задачи, на пример, во врска со интересите на безбедносната политика во Африка и Блискиот Исток“, додаде германскиот министер.
Писториус, исто така, рече дека НАТО мора да се прилагоди на новите околности и да стане „по-европски ориентиран“, со поголема одговорност на европските држави за сопствената безбедност.
Според него, Германија се движи во вистинската насока.
„Бундесверот расте, новата опрема се стекнува побрзо, а важната инфраструктура се проширува“, истакна Писториус.
Тој, исто така, ја спомена соработката во рамките на неформалната европска „Група на петте“, која ја сочинуваат Германија, Франција, Велика Британија, Полска и Италија, со цел хармонизирање на безбедносните политики и зајакнување на одбранбените капацитети на Европа.