„Иран пропаѓа финансиски! Тие сакаат Ормутскиот теснец веднаш да се отвори – гладни се за пари! Губат 500 милиони долари дневно (…) СОС!!!“, напиша американскиот претседател на својата социјална мрежа Truth Social.
Во вторник, Трамп објави продолжување на примирјето со Иран до понатамошно известување, со цел да му даде на Техеран повеќе време за преговори, а воедно да ја задржи блокадата на иранските пристаништа.
Во објава на Truth Social, американскиот претседател напиша дека одлучил да го „продолжи прекинот на огнот“ сè додека „Иран не презентира предлог за прекин на конфликтот“.
Тој, исто така, им нареди на вооружените сили да ја одржат блокадата.
Неколку часа пред неговото соопштение, Трамп изјави за CNBC дека не е склонен да го продолжи привременото примирје и дека американската војска „се подготвува за акција“.
Белата куќа соопшти по објавувањето на Трамп за продолжувањето на примирјето дека потпретседателот Џ.Д. Венс, задолжен да води потенцијални нови разговори со Иран во Пакистан, нема да патува во таа земја во вторник како што беше првично планирано.
„Во светлината на пораката на претседателот Трамп на Truth Social, со која се потврдува дека САД очекуваат унифициран предлог од Иранците, патувањето во Пакистан нема да се случи денес“, изјави висок функционер на Белата куќа во изјава за новинарите.
До рано наутро во среда, немаше одговор од високи ирански функционери на објавата на Трамп, иако некои првични реакции од Техеран сугерираа дека коментарите на Трамп се гледаат со скептицизам, објавува Ројтерс.
Новинската агенција Тасним, поврзана со Корпусот на Исламската револуционерна гарда, објави дека Иран не побарал продолжување на прекинот на огнот и повторил закани за пробивање на блокадата на САД со сила.
Продолжувањето на примирјето од страна на Трамп е тактика за купување време за изненадувачки удар, изјави советник на главниот преговарач на Иран во вторник вечерта.
САД и Израел ја започнаа војната на 28 февруари со воздушно бомбардирање на Иран.
Конфликтот брзо се прошири во земјите од Персискиот Залив кои се домаќини на американски воени бази и во Либан откако милитантната група Хезболах се приклучи на борбите како одмазда за атентатот врз врховниот лидер на Иран, Али Хамнеи.
Израелскиот премиер Бенјамин Нетанјаху со децении се обидува да го собори раководството на Иран, но Трамп даваше променливи, а понекогаш и контрадикторни образложенија за приклучувањето кон Израел во започнувањето на војната, истакнува Ројтерс.
Повеќе од 5.000 цивили се убиени низ целиот регион од почетокот на војната, а стотици илјади се раселени, главно во Иран и Либан.
Војната доведе до практично затворање на Ормутскиот теснец, витална точка на глобалните енергетски пазари, предизвикувајќи нагло зголемување на цените на нафтата и стравувања дека глобалната економија би можела да влезе во рецесија.
Реториката на Трамп за време на војната се движеше помеѓу крајности.
Во заканата кон Иран пред само две недели, тој вети дека „целата цивилизација ќе умре вечерва“, додека во други прилики се чинеше дека сака да ја заврши војната и да предизвика несигурност на пазарот, додава Ројтерс.