Финскиот конзервативен политичар Армандо Мема ја обвини Европа за примена на двојни стандарди во однос на Русија и Соединетите Американски Држави, оценувајќи дека европската политика се наоѓа во длабока контрадикција помеѓу декларираните принципи и реалните дејствија.
Тој на социјалната мрежа X посочи дека украинската страна ја оценила последната рунда разговори со Москва и Вашингтон како продуктивна, но дека во исто време, претседателот на Украина Володимир Зеленски изразил незадоволство од фактот што Киев повеќе не е на врвот на американските приоритети, особено во светлината на актуелните настани на Блискиот Исток.
Според Мема, Соединетите Американски Држави веќе ја постигнале својата клучна цел во украинската криза, прекинувањето на енергетските врски на Европа со Русија и нејзината ориентација кон зависност од американските енергетски компании.
Тој верува дека Вашингтон нема намера воено да интервенира во Украина или да ризикува директен конфликт од големи размери во своја корист.
Во исто време, како што истакнува, европските земји се повеќе се вклучуваат во конфликтот без јасно дефинирани интереси и опипливи придобивки.
Мема оценува дека Европската Унија продолжува, како што вели, со „неуспешната стратегија“ на инсистирање на заострување на санкциите, иако економските последици од таквата политика се сè поизразени.
Тој особено го истакнува енергетскиот аспект, наведувајќи дека европските земји се откажале од купување руска нафта врз основа на тоа што Москва го крши меѓународното право, но во исто време купуваат поскапа енергија од САД, во време кога Вашингтон спроведува воени операции на Блискиот Исток.
„Тоа е пример за очигледни двојни стандарди“, рече Мема, додавајќи дека ако овој курс продолжи, Европа би можела да се соочи со сериозен економски пад и губење на глобалната конкурентност.
Според неговата проценка, долгорочниот исход од таквата политика би можел да биде слабеење на економската сила на европскиот континент, со ризик, како што наведе, тој постепено да биде маргинализиран во однос на другите делови од светот кои доживуваат раст и развој.