Со реакција на вчерашните обвинувања од страна на пратеникот на ВМРО-ДПМНЕ, Зоран Ѓоргиевски за наводни незаконитости во наплаќањето на училишниот превоз во Куманово со реакција се јавија и од општината.
Од таму велат дека ниту една лага на Никола Груевски и ВМРО-ДПМНЕ не може да го покрие незаконското работење на нивни функционери. Реакцијата ја пренесуваме интегрално.
Очаен е обидот на Груевски и ВМРО-ДПМНЕ да излегуваат со апсурди што немаат допир со реалноста на денот кога се очекува одлука околу продолжувањето на притворот на градоначалникот од нивните редови Владимир Талески, осомничен токму за финансиски малверзации со превоз на ученици.
Општина Куманово одговорно тврди дека дневна карта по ученик до 4 км е 50 денари, а до 7 км е 70 денари. Од тука произлегува дека цената за ученик е околу 5 денари километар, за неограничено возење во текот на денот. Исто така има и специјален превоз за деца до 14 години.
Списокот на ученици од 5.800 до 5.500, зависно од година, е издаден со адреса од самите училишта и врз основа на тоа се издаваат картите за возење.
Никогаш досега се нема случено двојно фактурирање или да фактурирање 36 дена во месецот, како што е случај со општините што ги раководи кадар на ВМРО-ДПМНЕ.
Сите институции се во рацете на власта на Груевски, низ општина Куманово поминаа неколку ревизии и контроли од финансиската полиција којашто ги разгледуваше договорите за превоз и тендерските постапки, така што денешната прес конференција на ВМРО-ДПМНЕ е класична и огромна лага, својствена за начинот на владеење на Груевски и ВМРО-ДПМНЕ што граѓаните ќе го казнат на следните регуларни избори – стои во реакцијата.