Сателитските снимки објавени од шведската телевизиска станица СВТ покажуваат зголемено воено присуство во близина на руската граница со Финска.
На четири локации на руска територија – Каменка, Петрозаводск, Североморск-2 и Олења – беа регистрирани нови воени објекти, сместувачки капацитети и распоредување на опрема и персонал.
Најблиску до финската граница е базата Каменка, оддалечена само 55 километри.
Повеќе од 130 воени шатори се поставени таму од февруари, а просторот, кој до неодамна беше неразвиен, сега може да прими до 2.000 војници, според проценките на СВТ.
Во Петрозаводск, на околу 175 километри од границата, изградени се три големи складишта во кои можат да се сместат 50 оклопни возила.
Аналитичарите веруваат дека целта на овие објекти би можела да биде прикривање на вистинскиот број на распоредени возила.
🔴 Russia is rapidly expanding military bases near Finland, boosting troop numbers and building new infrastructure, in what experts warn could be preparations for future conflict with NATO.https://t.co/zs6YqVly1Y pic.twitter.com/ho3Ozr9IIb
— UNITED24 Media (@United24media) May 13, 2025
Бројни хеликоптери беа забележани во базата Североморск-2, додека во Олења беше регистрирана понатамошна воена активност.
Украински извори тврдат дека базата се користи за напади врз украински цели.
Зголеменото воено присуство во близина на финската граница доаѓа откако Финска официјално се приклучи на НАТО во 2023 година, со што заврши нејзината долгогодишна неутралност што датира од времето на Советскиот Сојуз.
Шведска, од друга страна, се приклучи на Алијансата една година подоцна, во март 2024 година.
Рускиот претседател Владимир Путин потоа изјави дека Русија ќе преземе „неопходни мерки“ како одговор на, како што изјави, агресивните потези на Финска и НАТО.
Москва редовно ја обвинува Алијансата за експанзија и провокација и најавува одбрана на сопствената територија со сите расположливи средства.
Загриженост неодамна изрази заменик-началникот на финскиот Генералштаб, генерал-потполковник Веса Виртанен, кој смета дека Русија „намерно го тестира единството на НАТО“, особено во контекст на Член 5, кој гарантира колективна одбрана на сите членки.
Началникот на шведската армија, Михаел Клаесон, ја коментираше ситуацијата и рече: „Кога аплициравме за членство во НАТО, Русија рече дека ќе реагира. Сега сме сведоци на тие реакции“.