Руските сили започнаа нови бранови напади врз Бахмут во текот на изминатиот ден, но ниту една страна не успеа да направи клучен пробив во повеќемесечната битка за градот во источниот регион Доњецк, соопшти украинската војска на 25 април.
„Во тек се жестоки борби за градот Бахмут“, се вели во дневниот извештај на Генералштабот на вооружените сили на Украина, додавајќи дека главниот удар на Москва на бојното поле останува фокусиран на линијата на фронтот Бахмут-Авдивка-Маринка.
Руските сили извршија 62 воздушни и шест ракетни напади врз позиции на украинската војска и цивилни цели, се наведува во извештајот на Генералштабот.
Украинските бранители, исто така, одбија 43 руски напади врз Бахмут и Маринка, според извештајот.
Украинскиот заменик министер за одбрана Хана Малиар, пак, ги опиша тековните борби во Бахмут како „континуиран динамичен процес“.
Малиар рече на Телеграм на 25 април: „Можеме да изгубиме позиции во битка денес, и да ги вратиме следниот ден; затоа армијата претпочита да зборува за резултатот по завршувањето на операцијата“.
Коментарите на Милаир дојдоа еден ден откако украинските команданти ги негираа руските тврдења дека платениците од Вагнер групата имаат речиси целосна контрола врз градот.
Во Вашингтон, портпаролот на Советот за национална безбедност, Џон Кирби, предупреди дека руските сили може да ги засилат своите офанзивни акции како што времето ќе се загрее.
„Знаеме дека на пролет, кога времето ќе се подобри – и тоа веќе почнува да се подобрува – можеме да очекуваме дека Русите ќе сакаат да тргнат во офанзива во некои области. Не знаеме точно каде и како ќе го направат тоа, но сакаме да се увериме дека Украинците ќе можат подобро да се одбранат од тоа“, изјави Кирби за Гласот на Америка на 24 април.
Во исто време, додаде Кирби, доколку украинските сили решат да спроведат свои контраофанзивни операции, тие мора да ги поседуваат соодветните способности.
Воени експерти известија, а украинските лидери навестија дека се подготвува голема пролетна контраофанзива на Украина.
На 23 април, некои извештаи покажаа дека украинската армија ја преминала реката Днепар во јужна Украина и воспоставила позиции на нејзиниот источен брег.
Но, украинската војска ги негираше извештаите, нарекувајќи ги „шпекулации“.
„Мораме да бидеме внимателни со претпоставките на воените аналитичари и да разбереме дека тие се шпекулации“, рече портпаролката на армијата Наталија Хуменјук на 24 април, пренесува РСЕ.
Сите информации поврзани со најновите случувања со војната во Украина можете да ги прочитате ТУКА.