Жителите на францускиот Плуневантер цела недела ги мачи мистеријата на возилото „паркирано“ на настрешницата на автобуската станица. Од понеделник наутро, фотографиите од оваа глетка го обиколија светот, а додека некои се сомневаа дека се работи за „уметнички израз“, други причината ја пронашле во алкохолот.
За бизарната глетка била информирана и градската полиција, која пред да биде отстрането возилото од станицата, се обидела да стигне до сопственикот, но безуспешно, пренесува „Одити централ“.
– Тоа е целосна мистерија. Дознавме кој е сопственикот на возилото, но не знаеме како стигнало таму, а посебно нè интересира зошто – изјавил капетанот Кристоф Лавал.
Корисниците на социјалните мрежи, гледајќи ја фотографијата, веднаш се посомневаа во некаква модерна уметност дизајнирана од локален уметник или дека автомобилот на станицата е дел од маркетинг проект, но полицијата брзо разјаснила дека ниту една од овие теории не е веродостојна.
Помош побарале и на Фејсбук, а по една недела истражување на мистеријата која успеала да ги збуни сите, француските медиуми во понеделникот објавиле дека случајот конечно е решен. Се испостави дека не се работи за алкохол, туку за „трговска расправија“ меѓу сопственикот на комбето и сторителот на овој бизарен чин. Во бес, насилникот наводно го зел автомобилот и го кренал на настрешницата на автобуската постојка.
Двајцата се донесени на сослушување и може да се соочат со обвинение за загрозување на јавната безбедност.