Најмалку 21 лице загина, а 61 е повредено во експлозија во фабрика за огномет во кинеската покраина Хунан, објавија државните медиуми.
Експлозијата во Лиујанг, центар за производство на огномет, се случила околу 16:40 часот по локално време, според извештаите.
Снимките од социјалните медиуми покажуваат големи облаци чад што се издигаат кон ведрото небо.
Новинската агенција Синхуа објави снимки од густи облаци чад што се издигаат од место покриено со урнатини и остатоци.
Пет спасувачки екипи од близу 500 луѓе, заедно со три роботи за спасување, беа испратени на местото на настанот.
Два магацини со црн барут во рамките на фабричкиот комплекс претставуваа висок ризик, објавија кинеските медиуми, и додадоа дека властите ги евакуирале жителите од опасните зони, воспоставиле зона за спасување во радиус од еден километар и контролна зона од три километри околу местото на експлозијата, објавува Срна.
Детонацијата се случила во компанијата за производство и прикажување на огномет „Хуашенг“.
Лицето одговорно за компанијата е приведено, а причината за несреќата се истражува, објави државниот весник „Чајна дејли“.
Кинескиот претседател Си Џинпинг повика на брза истрага за да се утврди причината за експлозијата и одговорноста.