Според досегашните обработени гласови од страна на Опшинските изборни комисии, кандидатите за градоначалници на СДСМ водат во скоро сите општини во Североисточниот регион, освен во Липково.
Во Куманово според обработените 28,74% од гласачките места, води СДСМ и кандидатот Максим Димитриевски кој веќе ја прослави и прогласи победата во првиот круг. Според ДИК од обработените гласови, за СДСМ гласале 54,12%, а за Зоран Ѓорѓиевски од ВМРО-ДПМНЕ 32%.
Во Општина Старо Нагоричане блага предност од 64 гласови има Жаклина Јовановска од СДСМ пред нејзиниот против кандидат од ВМРО-ДПМНЕ, Елена Јаќимовиќ. Според информациите од терен, во оваа општина ќе има втор круг.
Во Крива Паланка со 58,07% води Борјанчо Мицевски од СДСМ пред Арсенчо Алексовски од ВМРО-ДПМНЕ кој има 38,2% од досега обработените 59,57% од гласачките места.
Во Општина Ранковце исто така со блага предност е кандидатот на групата избирачи, Ивица Тошевски кој има 56,15% од досега обработените гласови, а зад него со 40,37% е Роберт Симоновски од ВМРО-ДПМНЕ. Во оваа локална самоуправа досега се обработени 79% од гласачките места.
Во Кратово води Љупчо Бојаџиев од СДСМ кој има 54% од досега гласовите обработени до 23 часот, а Мите Андоновски од ВМРО-ДПМНЕ има 40,62%.
Што се однесува до Липково таму води Еркан Арифи од ДУИ со 62% од вкупно обработените избирачки места, додека зад него со 23,88% е кандидатот на БЕСА Шабан Зендели.
Од обработените 24% од гласовите за советници во Општина Куманово, СДСМ има 51,78%, ВМРО-ДПМНЕ 34%, ДУИ 3% и Левица 2,17%.