Земјите како Норвешка, Данска, Финска, Шведска и Исланд често се високо рангирани на листите на земји каде луѓето се најсреќни и најзадоволни од својот живот.
На пример, овие земји отсекогаш биле меѓу првите десет земји во Светскиот извештај за среќа откако за прв пат беше објавен во 2013 година.
Ова не може да биде случајност и дефинитивно има нешто посебно во нив што ги издвојува од останатите.
Bright Side издвои неколку причини зошто е тоа така.
Тие ја ценат рамнотежата во животот
Скандинавците не претендираат да станат милијардери. Знаат да бидат ефективни на работа и да уживаат во тоа, но исто така поминуваат многу време со семејството и пријателите и посветуваат време на своите страсти и хоби.
Во Данска луѓето работат во просек 37 часа неделно. Повеќето вработени заминуваат од работа околу 16 часот, така што им останува многу слободно време. За споредба, луѓето во другите земји често работат повеќе од 40 часа неделно.
За да бидат што е можно попродуктивни и да завршат сè на време, Данците не губат време разговарајќи со колегите или паузирајќи. Згора на тоа, вообичаено е да комбинираат канцелариска работа и далечинско работење.
Вработените во Финска се исто така многу флексибилни, па можат да го закажат денот според нивните потреби.
Во Норвешка, вработените кои ќе се разболат добиваат до три недели платено боледување.
Празниците ги издвојуваат и од другите земји. Данците имаат право на пет недели платено отсуство годишно. Тие исто така имаат право на „платено отсуство поради стрес“ кога деловните обврски или односи влијаат на нивното ментално здравје.
Доколку сте преморени или незадоволни од вашата работа, можете да одите на одмор поради стрес и владата ќе ви понуди финансиска поддршка.
Сакаат да поминуваат време во природа
Поминувањето време на отворено има позитивен ефект врз физичкото и менталното здравје. А Скандинавците уживаат во природата и при ниски температури. Тие дури имаат и една изрека: „Нема лошо време, само лоша облека“.
Нивната љубов за поминување време на отворено има и име – friluftsliv. Дури и компаниите ги поттикнуваат своите вработени да вежбаат и да поминуваат време на отворено. Политиките на некои компании вклучуваат можност вработените во текот на работното време да поминат одредено време во природа.
Новите родители имаат поддршка
Новите мајки во Исланд имаат девет месеци платено отсуство, а татковците три месеци. За споредба, жените во САД имаат само 12 недели неплатено породилно отсуство.
Во Шведска на новопечените родители им се дава до 480 дена отсуство, а бенефитот е 80 отсто од нивната плата. Се додека децата не наполнат осум години, мајките можат да го скратат работното време до 25 отсто и да добиваат детски додаток додека детето не наполни 16 години.
Не се под стрес поради недостаток на пари
Во многу земји, луѓето трошат многу пари на здравствени услуги или образование. Во нордиските земји тоа не е случај, овие две работи се бесплатни.
Дополнително, се обезбедува поддршка и за невработените. Имаат осигурување за невработеност и детска поддршка, а им се нудат и места во програми за работно искуство.
Тие им веруваат на другите
Луѓето во скандинавските земји си веруваат еден на друг, што значи дека се чесни и се грижат за општото добро.
Нордиските земји имаат и помала стапка на криминал, па луѓето се чувствуваат побезбедни. Оваа сигурност и доверба можат позитивно да влијаат на нивната благосостојба.
На пример, луѓето од скандинавските земји веруваат дека нивниот изгубен паричник ќе биде вратен повеќе отколку луѓето од земјите кои се пониско рангирани во Светскиот извештај за среќа.